Planong umento sa SSS contribution, ikonsulta una sa mga miyembro ug employer
IKONSULTA sa Social Security System (SSS) sa mga stakeholder niini ang planong umento
sa kontribusyon sa mga miyembro ug employer.
Matud pa ni Joel Palacios, ang media affairs sa SSS, apil sa ilang konsultahon ang mga
labor union, mga employer ug uban pang grupo agig pagsunod na usab sa kamanduan sa
Social Security Commission (SSC).
Unsa man ang mogawas nga resulta sa konsultasyon, ila kining ibalik sa maong komisyon
nga maoy mopaabot sa rekomendasyon sa Malakanyang alang sa pag-apruba niini.
Gikan sa kasamtangang 10.4 porsyentong kontribusyon, gustong usbawan sa SSS ngadto
sa 11 porsyento ang kontribusyon sa mga miyembro ug employer sa katoyuang mabalik
ang perpetuity o walay limit nga pondo nga mapahimoslan ra usab sa mga miyembro ug
pensyonado. (ecbPIABohol)
