MANILA, Dec. 27 (PIA)–Giseguro sa Malakanyang nga himuon ang tanang lakang sa gobyerno aron masumpo ang Mexican drug cartel nga giingong naglihok na karon sa Pilipinas.
Matud pa ni Kalihim Herminio “Sonny” Coloma, Jr. sa Presidential Communications Operations Office (PCOO) nga katungdanan sa mga alagad sa balaod nga dakpon ang bisan kinsang molapas sa balaod aron mapanalipdan ang katawhan.
“Siyempre po, pag-iibayuhin ang pagsisikap para masabat o mahuli ang mga lumalabag sa batas, pigilin ang kanilang krimen at pangalagaan ang kapakanan ng mga mamamayan,” matud pa ni Coloma.
Gipasusi na sa Malakanyang sa Bureau of Immigration (BI) ang record sa Interpol sa mga nalambigit sa Mexican drug cartel nga naa sa Pilipinas karon dala ang kilo-kilong shabu aron ibaligya.
Giingong gitugyan na usab sa BI ang pagsusi sa entry records sa mga miyembro sa Mexican Sinaloa drug syndicate.
Una niini, gibutyag kagahapon ni Philippine Drug Enforcement Agency (PDEA) Director General Arturo Cacdac, Jr., nga nakasulod na sa Pilipinas ang gikahadlokang Sinoloa drug syndicate sa Mexico.
Kini human sa ilang operasyon sa Batangas diin nasakmit nila ang 84 kilos nga methamphetamine hydrochloride o shabu nga nagkantidad og P420 milyon.
Matud pa ni Cacdac nga ang nasud sa Mexico ang labing ulahing foreign country nga nag-operate og smuggled illegal drugs, partikular na ang shabu dinhi sa nasud gawas pa sa mga nasud sa China ug West African. (PIA7-Bohol/ECB)