TAGBILARAN CITY, Bohol, Jan. 08 (PIA)–Nihangyo ang Malakanyang sa publiko nga dili pangunahan si Presidente Benigno “Noynoy” Aquino III kalabot sa panawagang ‘total gun ban’ human ang shooting rampage sa Kawit, Cavite.
Matud pa ni Deputy Presidential Spokesperson Abigail Valte, angay tun-an una og maayo sa Presidente ang unsa mang balaodnon sa dili pa kini mohatag sa iyang posisyon.
Dugang pa ni Valte, daghang higayon nga gipakita sa Presidente ang iyang independent opinion nga sayop nga pagtuo sa kadaghanan sa iyang mga kritiko.
Kahinumdoman nga daghan kaniadto ang miingon nga dili paboran sa Presidente ang Sin Tax reform bill tungod kay hinabako usab kini, apan gi-sirtipikahan pa niyang ‘urgent’ hangtud nga gilagdaan niya kini sa wala pa nag-Pasko aron mahimo nang hingpit nga balaod.
Si Valte nagkanayon nga ang mga balaodnon sama sa total gun ban o balaodnon alang sa sa mas hingpit nga gun control tun-an una og maayo sa buhatan sa Presidente sa dili pa kini mohatag sa iyang posisyon kalabot niini. (PIA-Bohol/ecb/I-gg)
Palasyo, mipasalig nga walay mahitabong ‘whitewash’
sa imbestigasyon sa Quezon encounter
TAGBILARAN CITY, Bohol, Jan. 08 (PIA)–Mipasalig karon ang Malakanyang nga walay mahitabong ‘whitewash’ sa himuong imbestigasyon kalabot sa nahitabong engkuwentro sa Quezon province.
Atubangan kini sa panawagan sa mga paryente sa mga napatay nga “rubout” ug dili “shootout” ang nahitabo, dungan sa panawagang angay mosulod na ang NBI o DoJ sa imbestigasyon.
Matud pa ni Presidential Spokesperson Edwin Lacierda , wala una sila’y komento samtang gipahigayon ang imbestigasyon.
Si Lacierda nagkanayon nga bisan wala nihatag og timetable ang Presidente kun kanus-a kini angay mahuman, nakatutok kini sa dagan sa maong imbestigasyon.
Una nang nimando og halapad nga imbestigasyon ang Presidente aron matino gayud ang tinuod nga nahitabo ilabi na nga giingong may kalabot kini sa onsehan sa jueteng operation.
Una nang mihatag og pahayag ang Malakanyang gahapon nga lehitimong checkpoint ang gihimo sa mga operatiba tungod sa timbreng nadawat nga may taas nga kalibre sa armas ang grupo sa mga napatay. (PIA-Bohol/ecb/I-sjp)