MANILA, Feb. 18 (PIA)–Nagtinguha ang Department of Health (DOH) nga ang tanang kabus nga Pilipino sa nasud makapatambal ug dili na maghuna-huna kun unsaon mabayran ang ilang galastohon sa ospital.
Kini ang matabang sa Universal Health Care nga programa sa maong ahensya.
Matud pa ni DOH Secretary Enrique Ona, dili na kinahanglang mohatag pa og bisan unsang papeles ang pasyente sa dili pa sila tambalan tungod sa tabang niini.
Bisan ang pagbaton og utang sa mga pampublikong ospital, mawala na usab sa tabang sa Universal Health Care.
Dugay na kining programa sa ahensya diin may mga Pilipino pa gihapon nga wala kabalo niini.
Mao nga alang sa mga gustong makakuha sa libreng tambal, magpalista lamang sa ilang local health worker o mga kawani sa Department of Social Welfare and Development (DSWD).
Tungod niini, nangayo og tabang ang kalihim sa DOH sa mga lokal nga kagamhanan aron mapalapad pa ang kampanya niini kabahin sa Universal Health Care nga programa.
Kaabag sa DOH ang PhilHealth mao nga daghang Pilipino ang matabangan niini diin tanang galastohon abagahon sa gobyerno.
Giseguro usab ni Ona nga gipangitaan na nila karon og paagi ang kakulang sa mga nurse, doctor ug bisan ang mga pasilidad sa mga pampublikong ospital. (PIA7-Bohol/ECB)