TAGBILARAN CITY, Bohol, June 08 (PIA)–Gipalig-on na sa US Senate ang usa ka resolusyon alang sa dugang nga “defense and security cooperation” tali sa Pilipinas.
Gibutyag sa Department of Foreign Affairs (DFA) nga base sa taho sa embahada sa Washington, D.C., nahimong unanimous ang boto sa mga magbabalaod sa Estados Unidos sa Senate Resolution 481 nga gisang-at ni Republican Sen. Richard Lugar sa Indiana.
Matud pa usab ni Philippine Ambassador to the United States Jose Cuisia Jr., giingong gikonsiderar sa Pilipinas nga “positive development” ang maong lakang sa Amerika alang sa mas lig-on nga relasyon sa duha ka nasud.
Ubos sa maong resolusyon, giduso sa Amerika ang hingusgan nga bilateral security ties sa duha ka nasud, apil na ang pagduso sa defense modernization program sa Armadong Kusog sa Pilipinas, rotational presence sa US forces sa nasud ug dugang humanitarian ug disaster relief preparedness nga mga kalihokan.
“The Senate confirms the alliance’s centrality and enduring value as one of the key pillars of peace, stability and prosperity in the Asia-Pacific region and as a key tool in addressing the emerging security environment in the region,” parte sa gilatid sa maong resolusyon.
Kahinumdoman nga una nang giseguro ni Secretary of State Hillary Clinton ug US Defense Sec. Leon Panetta ang saad sa Estados Unidos nga pagduso sa nagpatunga nga Mutual Defense Treaty tali sa Pilipinas. (PIA-Bohol/ecb)
Land reform, priority sa administrasyong Aquino – DAR
TAGBILARAN CITY, Bohol, June 08 (PIA)–Atubangan sa panawagan sa grupo sa mga mag-uuma ug mga obispo alang sa full implementation sa extended Comprehensive Agrarian Reform Program (CARP), giseguro pagbalik sa Department of Agrarian Reform (DAR) nga pursigido ang gobyerno sa pagduso sa tinuoray nga repormang agraryo.
Gani, gipasigarbo ni DAR Sec. Virgilio de los Reyes nga sa unang duha ka tuig sa pag-alagad ni Presidente Beningo Aquino III, nahimo sa gobyerno ang pagpalit ug pagpangapud-apod sa gibana-banang naa sa 219,069 ektaryang kayutaan sa tibuok nasud.
“Though this is not exemplary, this is by no means the lowest accomplishment in the history of the CARP”, matud pa ni de los Reyes.
Una na usab giingon sa kalihim nga gipaspasan na sa gobyerno ang proseso alang sa pagpangapud-apod og yuta sa mga mag-uuma sa Hacienda Luisita sa lalawigan sa Tarlac.
Kahinumdoman nga gipalig-on na sa Korte Suprema ang pagpangapud-apod sa 4,916-hectare sugar estate sa kapin 6,000 ka mga trabahante sa bukid sa hacienda.
Ang Hacienda Luisita sa lalawigan sa Tarlac gipanag-iya sa pamilya ni Presidente Aquino.
Dugang pa sa opisyal nga target sa ilang buhatan nga mapaubos sa land reform program ang 961,974 ka ektaryang yuta sa tibuok nasud sa tuig 2014. (PIA-Bohol/ecb)