TAGBILARAN CITY, Bohol, Aug. 30 (PIA)–Walay plano ang gobyerno sa Estados Unidos nga magtukod og permanenteng military base sa Pilipinas.
Kini ang gipahayag ni United States Secretary of Defense Chuck Hagel human sa ilang courtesy call kang Presidente Benigno ‘Noynoy’ Aquino III sa Malakanyang ganinang buntag.
Gibutyag ni Hagel sa joint press conference nga ang gimugna nga framework agreement usa ka bag-ong modelo lamang alang sa dugang rotational presence sa rehiyon.
Matud pa ni Hagel, sigurado siyang mapahimoslan sa Estados Unidos ug Pilipinas ang maong kasabotan.
Dungan niini, subling gipasalig ni Hagel nga magpadayon ang maayong relasyon sa Estados Unidos ug Pilipinas.
Nanghinaot usab sila nga makab-ot na ang malinawon nga resolusyon sa territorial dispute sa West Philippine Sea. (PIA-Bohol/ecb)
CA, gimanduan ang AMLC nga susihon ang 400 bank accounts ni Napoles
TAGBILARAN CITY, Bohol, Aug. 30 (PIA)–Gimanduan sa Court of Appeals ang Anti-Money Laundering Council o AMLC nga susihon ang bank ug financial accounts ni Janet Lim-Napoles, mga miyembro sa iyang pamilya, staff, ug non-government organizations nga giingong iyang hinimo.
Nakabutang sa 24 ka pahinang resolusyon nga gisulat ni CA Associate Justice Normandie Pizarro nga sakop sa maong resolusyon ang kapin 400 ka financial accounts ni Napoles.
Gihatagan usab sa appellate court ang AMLC og lima ka buwan aron susihon ang maong mga accounts ug gitahasan nga mohatag og report sa korte sulod sa 10 ka adlaw.
Gawas kang Napoles, sakop usab sa kamanduan ang mga mga miyembro sa pamilya Napoles nga silang Jo Christine Napoles, Jaime Garcia Napoles, James Christopher Lim Napoles, Jean/Jane Catherine Lim Napoles, John Christian Lim Napoles, Reynald Lim, ug Ronald Francisco Lim.
Bisan ang account sa pork barrel whistleblower nga si Benhur Luy ipasusi usab sa hukmanan apil na sa inahan niini nga si Gertrudes, ug mga accounts nila Arthur Luy, Merlina Sunas, Evelyn Ditchon De Leon, Marina Sula, Nova Kaye Dulay Batal, ug Simonette Briones.
Apil sa mga bangko nga sakop sa maong kamanduan ang Hongkong and Shanghai Bank, Citibank, Bank of the Philippine Islands, Land Bank of the Philippines, Banco De Oro, Metrobank, ug United Coconut Planters Bank.
Niadtong Agosto 16, nagpagawas og freeze order sa accounts ni Napoles ang CA human siya ang gitumbok nga utok sa multi-bilyun pisong pork barrel fund scam. (PIA-Bohol/ecb)