TAGBILARAN CITY, May 24 (PIA)–Kaabag ang Philippine Information Agency (PIA), gilusad ning bag-o lang sa Social Security System (SSS) ang ilang opisyal nga microsite – ang UsapangSSS.ph – nga nagtinguhang matubag ang mga pangutana sa mga programa ug serbisyo sa SSS alang sa mga miyembro niini pinaagi sa internet.
Sugod niadtong Mayo 2, mahimo nang magamit ang UsapangSSS.ph sa mga miyembro sa SSS apil na usab sa mga dili pa miyembro niini.
Ang mga interesadong mogamit angay unang magparehistro aron sila makaapil sa ‘discussion board’ sa maong microsite.
Pinaagi lamang sa pagparehistro ug paghatag sa mga kinahanglang impormasyon sa microsite, awtomatikong magpadala og usa ka email ang SSS.
Sulod sa maong email ang activation key ug web link aron makumpirmar kun nahimong malamposon ang ilang pagparehistro.
Gamit ang pinakabag-ong online media platform, ang SSS makahatag og mga kasayoran sa mga kasagarang pangutana sa mga hisgotanan sama sa mga benepisyo, pautang ug uban pa.
Kun ma-activate na ang registration, mahimo nang mag-post og kumento sa mga forum ug makapadala og mga pribadong mensahe sa forum administrator alang sa mga dugang kasayoran nga gusto nilang klarohon. (ecb/PIA7-Bohol)
