TAGBILARAN CITY, July 15 (PIA)–Mahimo nang magparehistro sugod karong adlawa ang mga mobotar alang sa Sangguniang Kabataan (SK) ug barangay eleksyon.
Molanat ang pagparehistro hangtud sa Hulyo 30, adlaw nga Sabado.
Alang sa mga magparehistro sa SK, apil sa mga requirement mao nga kinahanglang Filipino citizen, may edad 15 taman 30 anyos ug residente sa barangay diin didto siya mobotar nga dili moubos sa unom ka buwan sa Oktubre 31 ning kasamtangang tuig.
Samtang alang sa magparehistro sa barangay eleksyon, kinahanglang Filipino citizen, 18-anyos sa adlaw sa eleksyon, residente sa Pilipinas sulod sa usa ka tuig ug residente sa barangay diin siya planong mobotar nga dili moubos sa unom ka buwan sa adlaw sa piniliay.
Gi-awhag sa Commission on Elections (Comelec) ang mga botante ilabi na kadtong wala pa naka-parehistro sa niaging nasodnong piniliay nga pahimoslan kining higayon aron makapatala sa voters’ list. (ecb/PIA7-Bohol)