TAGBILARAN CITY, October 26 (PIA)–Gitakda na sa Commission on Elections (Comelec) ang pagbukas og balik sa voters registration sa sunod buwan alang sa Barangay ug Sangguniang Kabataan (SK) elections.
Base sa resolusyon en banc nga gipagawas sa Comelec, sa Nobyembre 7 o halos duha ka semana gikan karon ibalik sa pagpa-rehistro sa mga botante nga molanat taman sa Abril 29 sa sunod tuig.
Matud pa nga mas gi-uswag sa Comelec ang registration aron masiguro ang partisipasyon sa mas daghan pang botante.
Subling gi-schedule ang voters registration human milusot sa Senado ug Kamara ang balaodnon nga i-oktaba ang maong eleksyon nga gi-uyonan usab ni Presidente Rodrigo Duterte.
Tungod niini, gipaabot ang dugang tulo ka milyong magparehistro sa barangay election ug duha ka milyon usab alang sa SK.
Matud pa sa Comelec nga sa gipahigayong registration niadtong Hulyo 15 hangtud 30, naa sa tulo ka milyong mga botante ang nagpatala sa tibuok nasod. (ecb/PIA7-Bohol)