TAGBILARAN CITY, Bohol, Jan. 28 (PIA)–GIBUTYAG ni Presidente Benigno “Noynoy” Aquino III nga sa Pilipinas ipahigayon ang East Asia Summit sa World Economic Forum (WEF) sa 2014.
Wala una mohatag ang Presidente og komento kun makatambong pa sa sunod tuig ang Pilipinas sa tinuig nga WEF nga ginapahigayon sa Davos, Switzerland matag katapusang semana sa buwan sa Enero.
Nagtuo ang Pangulo nga daku ang makuhang benepisyo sa Pilipinas kun dinhi ipahigayon ang East Asia Summit.
Matud pa nga namatngonan na karon ang Pilipinas sa mga “political ug economic honchos” sa Europe human ang lima ka tuig.
Dungan niini, gibutyag usab sa Presidente nga mobisita sa nasud sa sunod nga mga buwan ang usa ka global economic team aron mangita og business opportunities partikular na sa sektor sa edukasyon ug information technology. (PIA-Bohol/ecb/i-ed)
GPH ug MILF, nagkauyon sa pagtukod og panel nga mag-monitor sa peace deal
TAGBILARAN CITY, Bohol, Jan. 28 (PIA)–MILAGDA ang gobyerno sa Pilipinas ug Moro Islamic Liberation Front (MILF) sa mga termino kalabot sa pagtukod og ika-tulong partido nga mag-monitor sa implementasyon sa Bangsamoro Framework agreement.
Matud pa ni government chief negotiator Miriam Coronel-Ferrer, usa kini sa pinakamahinungdanong nakab-ot sa pagtapos sa 35th round sa formal exploratory talks nga gipahigayon sa Kuala Lumpur, Malaysia.
Dugang pa ni Ferrer, siguradohon sa maong third party nga mahuman ang implementasyon sa kasabotan dili susama sa mga naunang proseso.
Mag-nominate ang duha ka panig sa mahimong tinugyanan gikan sa lokal ug international non-government organization.
Samtang kinahanglang magkauyon ang gobyerno ug ang MILF kun kinsang indibidwal ang mamuno sa tukoron nga panel. (PIA-Bohol/ecb/p-sjp)
