MANILA, Mar. 18, 2014 (PIA)–Masaligon ang World Bank nga padayong molambo pa ang ekonomiya sa Pilipinas karong 2014 ug sa 2015 taliwala sa dakung kadaot nga gibilin sa labing kusog nga bagyong Yolanda.
Matud pa niini, posibleng molambo ang atong ekonomiya karong tuig og 6.6 porsyento ug 6.9 porsyento sa sunod tuig.
Pasabot sa World Bank, makatabang ang post-Yolanda reconstruction program sa gobyerno nga gibanabanang nagkantidad og 8 bilyon dolyares aron makunhoran ang negatibong epekto sa maong kalamidad sa atong ekonomiya.
Gawas niini, dalan usab sa kalamboan ang repormang gipatuman sa gobyerno aron mapamaayo ang nagkalain-laing sektor sa nasud. (PIA7-Bohol/ECB)