MANILA, October 7 (PIA)–Target sa Duterte administration nga mahatagan og serbisyo sa elektrisidad ang tibuok nasod sa paghidangat sa tuig 2020.
Kini ang gipahayag ni Department of Energy (DOE) Kalihim Alfonso Cusi sa iyang pag-atubang sa mga negosyanteng gikan sa Europa sa gipahigayong EU Summit ning bag-o lang.
Gawas sa target nga 100% electrification, giingong tinguha usab sa kasamtangang administrasyon nga hiusahon ang power grid sa Luzon, Visayas ug Mindanao sa paghidangat sa 2022.
Gipasabot ni Cusi nga prayoridad nila nga masiguro nga ayuhon ang serbisyo sa kuryente sa matag panimalay sa tibuok nasod ug pagpakusog sa suplay niini.
Aron mapatuman ang mga proyektong may kalabotan sa enerhiya, giingong dalion usab nila ang proseso sa pagkuha og mga permit ug mga gikinahanglang dokumento.
Giingong angay usab nga mahatagan og mga tukmang insentibo ang mga musolod sa energy sector projects sama sa exemption sa real property tax ug uban pa aron mang-engganyo og mas daghan pang tigpamuhunan. (ecb/PIA7-Bohol)
