GIPASIGARBO ni Presidente Benigno “Noynoy” Aquino III ang gasa nga mga investment nga iyang dala gikan sa malampuson nga upat ka adlaw nga unang state visit sa nasud sa China.
Miabot sa nasud ang Presidente niadtong Sabado sa gabii sa Ninoy Aquino Intenational Airport (NAIA).
Sa iyang arrival statement, miingon si Presidente Aquino nga gikan sa 36 nga pakigpulong sa Beijing, Shanghai ug Xiamen sa mga Chinese investors ug officials, nakuha nila ang $1.282 bilyon nga mga bag-ong investments.
Giingong i-dugang pa niini ang $3.8 bilyon nga halos sigurado na nga investments nga ibubo sa nasud ug ang giingong dili mo-ubos sa $7.9 bilyon investment gikan usab sa mga korporasyon nga nipakita og interes nga mamuhunan usab sa Pilipinas.
Gitataw sa Presidente nga klarong napaabot ang mensahe nga bukas ang Pilipinas pag-abot sa pamuhunan sa limpyo nga pamaagi.
Giingong napadayag sa iyang mga kauban nga halos 300 ka mga negosyante ug sa iyang economic team ilabi na sa larangan sa business opportunities, sa agrikultura, imprastaktura, enerhiya ug turismo.
Bisan pa niini, walay gipahayag ang Presidente kalabot sa isyu sa gi-ilogan nga Spratly Islands.
Samtang, gipasigarbo usab sa pangulo ang iyang pagbisita sa Fujian province nga lugar sa iyang pamilya nga mga Cojuangco. (PIA Bohol/ecb)
