TAGBILARAN CITY, Bohol, Jan. 04 (PIA)–Buksan na usab ang ika-13 nga Ubi Festival karong Enero 23 ug molanat kini hangtud sa Enero 25, 2013 agig pagsaulog sa lagutmon nga nahimo nang parte sa kabilin sa mga Bol-anon.
Sa Kapihan sa PIA kagahapon, gibutyag ni Eleno Evangelista, ang Promotion Section Head sa Office of the Provincial Agriculturist (OPA) nga ang kasaulogan karong tuig nagdala sa tema nga: “Ubi: Gasa sa Kinaiyahan, Latas sa Katuigan sa Katawhang Bol-anon Gi-ugmad ug Gi-ampingan.”
Ang Ubifest, usa ka tinuig nga kapistahan agig pagsaulog sa lagutmon aron pagsugat sa tinuig usab nga ubi harvest.
Ang 13th Ubi Festival ipahigayon sa Plaza Rizal samtang sa Acasia Garden sa Provincial Capitol Grounds usab ang festival venue.
Matud pa ni Evangelista nga ang mga kalihokan naglakip sa Fair and Product Exhibits, Market Matching, Literary and Musical Competitions, Ubi Eating Contest, Quiz Bee, Search for Miss Ubi 2013, ug ang Product Development Contest.
Ang product display magpakita sa nagkalain-laing ani sa ubi sa nga mag-uuma gikan sa mga mosalmot nga mga lungsod sa Bohol.
Ang maong kalihokan gipasiugdahan sa kagamhanang probinsiyal pinaagi sa Office of the Provincial Agriculturist sa pakig-alayon sa Department of Agriculture pinaagi sa Bohol Agricultural Promotion Center, Agricultural Training Institute ug sa ubang ahensya sa nasudnong kagamhanan. (PIA-Bohol/ecb/p-ed)
