MANILA, April 23 (PIA)–Gi-aprobahan na ni Presidente Benigno ‘Noynoy’ Aquino III ang pagpagawas sa P2.259 bilyong tabang pinansiyal alang sa unang batch sa 48,995 ka kawani nga nagtrabaho sa nagkalain-laing ahensiya sa gobyerno sa Rehiyon 4B, 5, 6, 7 ug 8 nga nawad-an og pinuy-anan tungod sa kusog nga linog sa Bohol ug sa kusog nga bagyong ‘Yolanda’.
Nipahigayon og special cabinet meeting ang Presidente kalabot sa Yolanda Comprehensive Rehabilitation and Recovery Plan (CRRP).
Sa maong pulong, subling gimanduan sa Presidente ang mga hingtungdang miyembro sa gabinete nga paspasan ang implementasyon sa tanang programa ug proyekto alang sa rehabilitasyon sa mga lugar nga naapektuhan sa bagyong Yolanda.
Gitumbok ni PNoy sa pulong ang kamahinungdanon sa pagpabalik sa normal nga panginabuhi sa mga biktima apil na ang pagsiguro sa luwas nga kahimtang sa mga lugar.
Matud pa ni Presidential Communications Operations Office (PCOO) Kalihim Sonny Coloma Jr., gimanduan sa Presidente ang tanang hingtungdang Cabinet Secretaries sa pagpadali sa implementasyon sa tanang mga programa, aktibidad ug proyekto kalabot sa rehabilitasyon ug pag-ayo sa tanang lugar sa nasud nga naapektuhan sa bagyong Yolanda.
Giingong gitumbok sa Presidente ang kamahinungdanon sa ‘building back better, ug dugang ‘resilient communities’.
“Also announced at the meeting was the approval by the President of the release of the amount of P2.259 billion as financial assistance for the first batch of 48,995 employees from national government agencies based in Regions IV-B, V, VI, VII, and VIII, whose houses were totally, heavily, or partially damaged by Typhoon Yolanda and the Bohol earthquake,” matud pa ni Coloma. (ecb/PIA7-Bohol)
