MANILA, April 10 (PIA)–Gilagdaan na ni Presidente Benigno ‘Noynoy’ Aquino III ang Proclamation No. 991 nga nag-deklarar sa tuig 2015 isip ‘Visit the Philippines Year’ agi usab og pagpangandam sa Asia-Pacific Economic Cooperation (APEC) Forum diin ipahigayon kini dinhi sa nasud karong tuiga.
Gitahasan ni PNoy ang tanang ahensiya sa gobyerno nga magtinabangay ug suportaan ang pagpalambo pa sa turismo sa nasud karong tuig 2015.
Nakalatid sa maong proklamasyon nga hiusahon ang mga aktibidad sa pribado ug pampublikong sektor sa usa ka “Calendar of Events” diin ipasigarbo ang ang mga hinimo sa mga Pinoy sa larangan sa musika ug arte, lifestyle ug entertainment, sports ug adventure, negosyo ug history ug culture.
Sa maong proklamasyon, gitahasan sa Presidente ang mga hingtungdan nga nasudnong ahensiya ug lokal nga kagamhanan nga suportaan ang mga gihimong lakang sa Department of Tourism (DOT) aron mapalambo pa ang turismo sa nasud.
Gi-ila sa moang proklamasyon ang katakos sa ahensya sa turismo nga i -mobilize ang mga-resources niini aron magbukas og oportunidad alang sa imprastraktura ug product development, makamugna og trabaho ug pamuhonan ug mapalig-on ang public and private partnership.
Apil usab sa gitahasan ang mga embahada ug konsulado sa Pilipinas sa nagkalain-laing dapit sa kalibotan sa pagtabang sa pagpakatap sa impormasyon aron iduso ang turismo sa nasud.
Gitahasan usab ang Postmaster General nga magpagawas og special stamp alang sa Visit the Philippines 2015 campaign.
Gi-aghat usab sa proklamasyon ang mga pribadong kompanya sama sa hotels, tour companies, restaurants ug souvenir shops nga suportahan ang kampanya sa DOT ug magmugna usab og mga programa ug packages alang sa mga lokal ug langyaw nga turista.
Gawas sa APEC Forum nga ipahigayon dinhi karong tuig, ipahigayon usab dinhi sa atong nasud sa 2016 ang Association of Southeast Asian Nations (ASEAN) Tourism Forum diin nakita sa gobyerno nga magamit ang maong mga panagtapok aron mapalambo pa ang turismo sa Pilipinas. (ecb/PIA7-Bohol)
