TAGBILARAN CITY, Bohol, Sept. 19 (PIA)–Tulo sa matag upat ka Pilipino ang kuntento sa trabaho sa administrasyon ni Presidente Benigno ‘Noynoy’ Aquino III.
Kini ang migawas sa pinaka-ulahing survey sa Social Weather Stations (SWS).
Gihimo ang survey niadtong Hunyo 28 hangtud Hunyo 30 sa 1,200 ka tawo nga may edad 18 ka tuig pataas ug gimantala sa pahayagang Business World.
Base sa survey, 75% sa mga Pinoy ang kuntento samtang 9% ang dili kuntento ug 16 % ang walay desisyon.
Kini nagpasabot nga adunay “very good” net score nga +66, 13 ka puntos nga paglambo gikan sa “very good” nga +53 (68% ang kuntento samtang 15% ang dili kuntento) niadtong buwan sa Marso.
Mas taas nga satisfaction ratings kini sa gobyernong Aquino kun itandi sa milabay nga administrasyon.
Apan mi-ubos ang ratings sa administrasyon kalabot sa isyu sa pagbasura sa korupsyon, pakigsabot-sabot sa mga rebeldeng Muslim ug komunistang rebelde.
May kalabotan kini sa init nga panawagan sa pagtangtang sa pork barrel ug padayon nga giyera sa Moro National Liberation Front (MNLF) ug sa tropa sa gobyerno sa Zamboanga City. (PIA-Bohol/ecb)
Mga gipasakaan og kaso kalabot sa pork barrel scam,
imbestigahan usab sa BIR
TAGBILARAN CITY, Bohol, Sept. 19 (PIA)–Imbestigahan na usab sa Bureau of Internal Revenue (BIR) ang mga gipasakaan og kaso kalabot sa P10 bilyon pork barrel scam.
Matud pa ni BIR Commissioner Kim Henares, mangayo sila og kopya sa reklamo nga gipasaka sa Department of Justice (DOJ) ug National Bureau of Investigation (NBI) sa Ombudsman ug aron susihon kun nagbayad ba og saktong buwis ang mga nag-atubang sa kasong plunder, malversation ug uban pa.
Apan gitata ni Henares nga wala kini nagpasabot nga mopasaka sila dayon og kasong tax evation.
Gitumbok sa kalihim nga mag-agad kini sa makuha nilang ebidensya.
Kahinumdoman nga 38 ka indibidwal kauban sila Janet Lim Napoles, ang giingong utok sa scam; Senador Juan Ponce Enrile, Sen. Jinggoy Estrada ug Sen. Bong Revilla ang gikasuhan kalabot sa anomaliya sa P10 bilyon pork barrel scam. (PIA-Bohol/ecb)
