5 Bol-anon nga nakalingkawas sa Okt. 15, 2013 nga linog,
posibleng makauban sa usa ka salo-salo sa Santo Papa
TAGBILARAN CITY, Bohol, Sept. 17 (PIA)–Posibleng lima ka Bol-anon nga nakalingkawas sa magnitude 7.2 nga linog sa lalawigan Bohol niadtong Oktubre 15, 2013 ang makauban sa usa ka salo-salo ni Pope Francis sa iyang pagbisita dinhi sa nasud sa Enero 2015.
Matud pa ni Tagbilaran Bishop Leonardo Medroso nga kun maapil sa iskedyul, moadto ang lima sa Palo, Leyte dungan sa pagbisita didto sa Santo Papa aron makauban sa paniudto.
Naglaom si Bishop Medroso nga bisan kadali lamang, mobisita usab si Pope Francis sa Bohol aron maduaw ang mga residenteng naapektuhan sa linog tungod kay maghatag kini og inspirasyon ug paglaom.
Apan gitataw usab sa obispo nga parte lamang kini sa preparasyon ug dili pa kumpirmado sa Vatican.
Sa labing ulahing impormasyon gikan sa Catholic Bishops Conference of the Philippines (CBCP), sa Nobyembre pa ipahibalo ang official itinerary sa Santo Papa sa iyang pastoral visit dinhi sa nasud. (ecb/PIA7-Bohol)
