TAGBILARAN CITY, Bohol, Aug. 06 (PIA)–Modawat na karon og mga aplikante ang Philippine Overseas Employment Administration (POEA) alang sa recruitment sa ika-limang batch sa mga nars ug caregiver para sa Japan.
Matud pa ni POEA Administrator Hans Cacdac, target nilang makakuha og 130 ka kwalipikadong aplikante nga ipaubos una sa pre-employment orientation sa ahensya sa dili pa ipa-ubos sa interview sa mga hiring officer sa Japan International Corporation of Welfare Services (JICWELS) ug mga tinugyanan sa ilang health institution sa Japan nga nangita og mga nars ug care workers.
Adunay unom ka buwang preparatory Japanese language training nga abagahon sa Japanese government ang ipahigayon sa Technical Education and Skills Development Authority (TESDA) sa mga mopasar ug dugang unom ka buwang languange training nga ipahigayon usab sa Japan.
Ang mga kwalipikadong aplikante nga may pangedaron 20 hangtud 35 kinahanglang magparehistro online sa www.eregister.poea.gov.ph ug personal nga isumite ang mga dokumento sa Manpower Registry Division sa POEA sa mismong buhatan niini sa EDSA-Ortigas hangtud Agosto17, 2012.
Sa naunang upat ka batch, mokabat na sa 237 nurses ug 433 caregivers ang nagtrabaho na sa nagkalain-laing health institutions sa Japan. (PIA-Bohol/ecb)
PWDs, gi-aghat sa Comelec sa pagparehistro sa Agosto 11
TAGBILARAN CITY, Bohol, Aug. 06 (PIA)–Gi-aghat sa Commission on Elections (Comelec) ang mga adunay kakulian sa panglawas o persons with disabilities (PWD) nga pahimoslan ang special registration nga gitakda sa ahensya sa Agosto 11, Sabado.
Matud pa sa tigpamaba sa Comelec nga si Atty. James Jimenez, hatagan og prayoridad sa maong petsa ang mga PWD ug makadawat sila sa gikinahanglang tabang gikan sa poll agency.
Kadtong mga dili makahimo sa Agosto 11, mahimo pang magparehistro sa Comelec ug makadawat ra gihapon sa gikinahanglang nilang assistance.
Gitataw ni Jimenez nga dili lang kining maong adlaw ang gitakda nga mahatagan gayud ang mga PWDs sa gikinahanglan nilang assistance apan usa ra kini ka espesyal nga adlaw diin mahatagan gayud sila sa gikinahanglang tabang ug mahatagan og prayoridad. Apan sa regular day, naa gihapon motabang nila sa ilang pagparehistro.
Giingong kinahanglan lang sa mga PWD nga magdala og valid ID ug ilang mahimong assistor sa mismong adlaw sa eleksyon. (PIA-Bohol/ecb)
