MANILA, Feb. 4, 2014 (PIA)–Nakumpleto na ang 66,813 nga kakulang sa lawak-tunghaan sa tibuok nasud human gitugyan kang Presidente Benigno ‘Noynoy’ Aquino III kagahapon ang bag-ong 16 ka lawak-tunghaan didto sa Carmona National High School sa Carmona Cavite sa pagtinabangay sa Department of Education (DepEd) ug Department of Public Works and Highways (DPWH).
Gipangunahan ni Presidente Aquino ang ceremonial turn-over sa mga lawak-tunghaan sa mga tinun-an sa Grade 7, 8 ug 9.
Matud pa ni Presidente Aquino, ang pagkumpleto sa kakulang sa mga lawak-tunghaan sa nasud nahimo tungod na usab sa pagtinabangay sa pribadong sektor ug gobyerno aron mahatagan og dalan ang pasalig sa administrasyong Aquino nga dekalidad nga edukasyon alang sa mga estudyante.
Giingong ang mga lawak-tunghaan gikan sa one story structure ngadto na sa multi-floor buildings nga gitukod gamit ang nasudnon ug lokal nga budget ug donasyon.
Matud pa nga 35,000 ka lawak-tunghaan ang naggikan sa nasudnong budget, 13,189 usab ang gikan sa pondo sa LGUs ug 14,886 ang gikan sa mga lokal nga donasyon ug 1,215 ang gikan sa foreign donations.
Kapin sa duha ka libo usab ang naggikan sa PPP for school infrastructure project.
Apan matud pa sa Presidente, dili dinhi matapos ang pasalig alang sa dekalidad nga edukasyon. Giingong padayong maningkamot ang gobyerno aron makab-ot ang hayag nga kaugmaon.
Mao nga human makumpleto ang kakulang sa lawak-tunghaan, textbooks ug mga lingkoranan, target na usab sa gobyerno nga tubagon ang 4,000 nga kakulang sa mga magtutudlo sa nasud.
Samtang gipasalig ni DepEd Secretary Armin Luistro nga magpatukod pa gihapon sila og mga bag-ong lawak-tunghaan isip pagpangandam na usab sa implementasyon sa senior high school nga Grades 11 ug 12 sa tuig 2016. (PIA7-Bohol/ECB)
