TAGBILARAN CITY, Bohol, Aug. 14 (PIA)–Pormal na nga gi-deklarar kagahapon ni Presidente Benigno “Noynoy” Aquino III isip regular holiday ang Agosto 20, adlaw nga Lunes, agig pagsaulog sa Eid’l Fitr sa mga Muslim.
Kini ubos sa Proclamation 455 nga gilagdaan sa Presidente alang sa maong holiday declaration sa tibuok nasud.
“To promote cultural understanding and integration, the entire Filipino nation should have the full opportunity to join their Muslim brothers and sisters in the observance and celebration of Eid’l Fitr,” ani sa parte sa proklamasyon.
Tungod niini, adunay long weekend ang katawhan sugod Sabado, Agosto 18 hangtud Martes, August 21 nga deklarado usab nga holiday tungod kay Ninoy Aquino Day.
Sa Agosto 21, ihandom ang adlaw diin gipusil ug napatay ang amahan sa Pangulo nga si kanhi Senador Ninoy Aquino.
Samtang nagpaabot usab ang long weekend sa katawhan sa Agosto 27.
Base sa listahan sa mga holidays karong 2012 sa Palasyo, deklaradong holiday usab ang Agosto 27 tungod kay National Heroes Day kini nga naa sa katapusang adlaw sa Domingo sa buwan sa Agosto. (PIA-Bohol/ecb)
PNoy sa Comm Group: tabang sa pagpa-simple sa weather advisory
TAGBILARAN CITY, Bohol, Aug. 14 (PIA)–Gimanduan mismo ni Presidente Benigno “Noynoy” Aquino III si Presidential Communications Sec. Sonny Coloma nga makighinabi ni Department of Science and Technology Sec. Mario Montejo ug sa PAGASA aron himuong simple ang weather bulletins.
Kahinumdoman nga dugay nang gireklamo sa Presidente ang komplikado ug teknikal kaayo nga weather updates sa PAGASA.
Matud pa ni Sec. Coloma, plantsahon pa nila kun unsaon paghimong klaro ug mas daling masabtan ang mga advisory kalabot sa panahon.
Sigun pa ni Coloma, himuon usab nilang mas kanunay ang pagpagawas sa mga anunsyo sa radyo ug telebisyon sa gobyerno, apil na usab sa Twitter.
Gawas sa Pangulo, daghang katawhan ang wala pa nakasabot sa gigamit nga color coding sa gidaghanon sa ulan ug sa Project NOAH sa DOST-PAG-ASA. (PIA-Bohol/ecb)
