MANILA, April 23 (PIA)–Gi-isa na sa Department of Foreign Affairs (DFA) ang crisis alert level 1 alang sa mga Pilipinong tua sa South Africa.
Ubos sa maong alerto o precautionary phase, gitambagan sa Embahada sa Pilipinas sa Pretoria ang naa sa 900 ka Pilipino sa South Africa nga mag-amping ug magbinantayon.
Gi-isa sa DFA ang alerto sa South Africa tungod sa mga kagubot o gitawag nga “xenophobic violence” sa maong nasud diin target ang mga migrant o mga langyaw.
Dungan niini, nipagawas na usab og pahayag sa pagkodenar ang DFA sa mga nahitabo nga kagubot sa South Africa.
Gikasuko sa mga South Africans ang pagtrabaho sa mga langyaw nga mamumuo didto tungod kay giingong nahatag kanila ang mga trabaho nga alang unta sa mga South Africans taliwala sa grabeng ‘jobs shortage’ kun kakulang sa mga trabaho didto. (ecb/PIA7-Bohol)
