TAGBILARAN CITY, August 2 (PIA)–Ang mga Bol-anon sa pagpanguna sa Philippine National Police-Bohol Provincial Police Office (PNP-BPPO) mipahigayon og anti-illegal drugs campaign rally karong adlawa sa syudad sa Tagbilaran nga nagdala sa tema nga: “Batukan Ta Ang Droga, Gubaton Ta Ang Durogista.”
Kini gibuksan pinaagi sa parada ug motorcade ganinang alas 8:30 sa buntag gikan sa Kampo Dagohoy, niagi sa mga nag-unang kadalanan sa syudad, paingon sa CPG Sports Complex diin didto gipahigayon ang programa.
Gitambongan kini sa nagkalain-laing grupo ug organisasyon, apil na ang patigayon, simbahan, cause-oriented groups, mga tunghaan, drug surrenderees, police personnel, ahensiya sa gobyerno, pribado ug ang mga relihiyosong sektor.
Gipangunahan ang maong rally nilang Gobernador Edgar Chatto, Tagbilaran City Mayor John Geesnell Yap II, Bohol PNP Provincial Director PSSupt. Felipe Natividad, Provincial Administrator Ae Damalerio, Board Members Ricky Madayon ug Agapito Avenido.
Nitambong usab ang malamposong magpapatigayon nga si Robinson Te, kinsa nihatag og testimonya isip drug dependent ug gi-unsa niya paglingkawas sa maong bisyo.
Si Gob. Chatto misugod paghatag sa iyang mensahe pinaagi sa paghalad og pag-ampo sa tanang kapolisan nga nihalad sa ilang kinabuhi sa pagbatok sa ilegal nga droga.
Samtang si Mayor Yap nihisgot sa PAGLAUM Center, usa ka inisyatiba sa syudad sa Tagbilaran nga maghatag og intervention program ngadto sa mga batang nakalapas sa balaod, nga naglakip usab sa rehabilitation program alang sa mga nitahan nga tiggamitan og ilegal nga droga.
Si PSSupt Natividad nitaho sa bag-o lang gipahigayong Provincial Peace and Order Council (PPOC) meeting nga gikan Hulyo 1 hangtud 29, ang kapolisan sa Bohol naka-proseso na og 30, 287 ka drug personalities gikan sa 47 ka lungsod ug sa syudad sa Tagbilaran. (ecb/PIA7-Bohol)
