TAGBILARAN CITY, August 10 (PIA)–Gitakdang ipahigayon ang ‘Bisita Opisina’ sa mga miyembro sa Association of United Development Information Officers in Bohol (AUDIO-Bohol) sa Agosto 11 sa Munisipyo sa Dauis.
Ang information officer sa LGU Dauis nga si Margo Bongalos gitakdang mohatag sa orientation/updates kabahin sa lungsod sa Dauis ug manguna sa office tour ug courtesy call sa mga miyembro sa AUDIO-Bohol ngadto kang Mayor Marietta Sumaylo.
Ang lungsod sa Dauis nisaulog niadtong Agosto 8 sa ilang ika-296 nga Foundation Day ug magsaulog sa ilang kapistahan sa partona sa Mahal nga Birhen sa Asuncion karong Lunes, Agosto 15.
Gipaabot ang panag-ambit og kasayoran sa mga information officers sa mga kalongsoran ug nasodnong ahensiya sa kagamhanang ania sa lalawigan atol sa Information Sharing sa maong panagtapok.
Gitakdang ipahigayon usab ang pagpili sa mga bag-ong opisyal sa AUDIO-Bohol sa maong panagtapok.
Ang AUDIO-Bohol, usa ka hugpong sa mga information officers kun tigpamaba sa mga kalongsoran ug nasodnong ahensiya sa kagamhanan nga nia sa lalawigan sa Bohol.
Usa sa kalihokan sa AUDIO-Bohol ang “Bisita Opisina,’ diin mobisita ang grupo sa mga buhatan sa ahensiya sa gobyerno ug munisipyo sa kalungsoran aron sa pagpahigayon og diskusyon ug pagpasabot sa ilang mga programa aron matabangan sa grupo sa pagpakatap niini. (ecb/PIA7-Bohol)
