by admin | Feb 1, 2017 | Kontra Droga, Major Events, Malakanyang Updates
MANILA, February 1 (PIA)–Gitun-an na sa Malakanyang ang pagmugna og special task force sa Armed Forces of the Philippines (AFP) nga motabang sa Philippine Drug Enforcement Agency (PDEA) sa anti-illegal drugs campaign.
Human kini sa direktiba ni Presidente Rodrigo Duterte sa Philippine National Police (PNP) nga ihunong na ang operasyon batok sa ilegal nga droga ug pagtutok sa internal cleansing batok sa mga police scalawags.
Sa pagpanumpa sa mga bag-ong na-promote nga military generals ug flag officers kagahapon sa Malakanyang nga gipangunahan ni Presidente Rodrigo Duterte, gipalutaw niini ang kamahinungdanon sa papel sa militar sa kalamboan sa nasod sa pagseguro sa kalinaw ug seguridad.
Sa maong oath-taking rites sa Malakanyang, gisukot sa Presidente ang mga bag-ong opisyal sa militar sa pagbantay sa kaayohan sa nasod ug sa pagtabang sa pag-implementar sa reporma sa gobyerno.
“As we endeavor to carry out reforms in all government agencies, I wish that you remain to be the kind of officers who put the welfare of the organization, the nation, and its people above your personal considerations,” matud pa ni Duterte.
Gibalik usab sa Presidente ang iyang panawagan sa militar sa pagpabiling loyal sa bandila ug sa konstitusyon.
Una nang miingon ang Presidente nga iya usab tahasan ang mga sundalo aron arestuhon ang mga badlongon nga polis. (ecb/PIA7-Bohol)
by admin | Feb 1, 2017 | Kontra Droga, Malakanyang Updates, National News
MANILA, February 1 (PIA)–Mi-apelar ang Malakanyang nga angay mosalig sa Philippine Drug Enforcement Agency (PDEA) ug National Bureau of Investigation (NBI) sa ilang anti-illegal drugs operations.
Kini human gipahunong ni Presidente Rodrigo Duterte ang Oplan Tokhang sa mga polis tungod kay nagamit kini sa mga police scalawags.
Matud pa ni Presidential Spokesman Ernesto Abella, mas maayo nga saligan na lamang ang proseso ug lakang sa PDEA ug NBI.
Samtang plano usab sa Malakanyang nga banhawon ang Philippine Constabulary (PC).
Mismong si Presidente Duterte ang nisugyot sa maong posibilidad sa gipahigayong command conference niadtong niaging semana.
Matud pa ni Abella nga sa pagkakaron, wala pa’y opisyal nga polisiya alang sa maong sugyot sa Presidente.
Apan giseguro ni Abella nga usa kini sa mahimong item sa balaodnong iduso sa administrasyon.
Gipasabot ni Abella nga banhawon ang P.C tungod kay gusto sa Presidente nga magbaton og mas masaligang ahensiya nga ang magpadagan mao ang militar ug dili “civilian in nature” sama sa PNP. (ecb/PIA7-Bohol)
by admin | Feb 1, 2017 | Headlines, Kita ug ang Gobernador, Kontra Droga, Local News / Bohol Balita
TAGBILARAN CITY, February 1 (PIA)–Gilagdaan ganinang buntag ni Gob. Edgar Chatto ang usa ka memorandum alang sa mga mayor ug kapitan sa barangay ning lalawigan sa Bohol nga nagmando sa pagtutok sa Community Based Drug Rehabilitation pinaagi sa pagpalig-on sa mga municipal center alang sa Drug Education ug Counseling ug ang Rehabilitation and Treatment Without Walls aron pagseguro nga luwas ug drug free ang Bohol.
Kini, bisan pa sa pagpahunong sa Oplan Tokhang ug Project Double Barrel sa Philippine National Police (PNP) apan magpadayon gihapon ang pakigbugno batok sa ilegal nga droga sa lalawigan sa Bohol.
Kalabot niini, gi-presentar ni Chatto kang Department of Interior and Local Government (DILG) Kalihim Ismael Sueno ganinang buntag ang nag-unang inisyatiba sa Bohol sa kalinaw ug kahusay, apil na ang anti-illegal drug war pinaagi sa Provincial Peace and Order Council, emergency response ug management pinaagi sa TaRSIER117, ang Countryside Development Program Purok Power Movement, ang Center for Drug Education and Counseling, ug ang Community Based Drug Rehabilitation Program.
Si Sueno ania sa Bohol karong adlawa isip pinasiduggang dinapit sa Provincial Congress sa Liga ng mga Barangay ng Pilipinas-Bohol Chapter nga gipangunahan ni Provincial Board Member Romulo Cepedoza.
Samtang karong adlawa usab, labaw sa 1,000 ka kapitan sa baragay ug 48 ka mayor ning lalawigan sa Bohol ang nagtapok ug pormal nga gi-selyohan ang ilang drug rehabilitation program.
Dinhi, gi-presentar sa mga lokal nga opisyal sa Bohol kang Sueno ang Community Based Drug Rehabilitation Program Without Walls diin ang desinyo sa padetalye niini opisyal nga gi-aprobahan kagahapon atol sa joint meeting sa Provincial Peace and Order Council (PPOC) ug sa Provincial Anti-Drug Abuse Council diin si Chatto ang chairman. (ecb/PIA7-Bohol)
by admin | Jan 31, 2017 | Kontra Droga, Major Events, Police Reports
TAGBILARAN CITY, January 31 (PIA)–Gi-anunsiyo ni Philippine National Police (PNP) chief Dir. Gen. Ronald Dela Rosa kagahapon nga ihunong una ang Oplan Tokhang ug Project Double Barrel sa PNP sa tibuok nasod.
Kini human gipabungkag ni Dela Rosa ang tanang anti-illegal drugs unit sa PNP agi og pagsunod sa mando ni Presidente Rodrigo Duterte.
Matud pa ni Dela Rosa nga gitangtang na sa Presidente ang gahom sa PNP sa pag-operate nga adunay kalabotan sa ilegal nga droga ug sa pagkakaron, “war on scalawags policemen” na ang tutokan sa nasudnong polisya.
Nagpasabot kini nga nakatutok na sila sa ‘internal cleansing’ human ang serye sa krimen nga gilambgitan sa mga polis partikular ang pagkamatay sa Koreanong si Jee Ick Joo.
Gibutyag pa ni Dela Rosa nga itukod sa PNP ang Counter-Intelligence Task Force nga mosusi sa tanang polis ilabi na kadtong mga napasakaan na og kaso kaniadto apan nakabalik pa gihapon sa serbisyo human mi-apela.
Magpadayon pa gihapon ang war on drugs sa gobyerno apan ang Philippine Drug Enforcement Agency (PDEA) na ang mahimong lead agency.
Una nang gi-anunsiyo ni Presidente Duterte nga gi-uswag niya ang war on drugs hangtud mahuman ang iyang termino nga unom ka tuig.
Dinhi sa lalawigan sa Bohol, opisyal nang gimando sa Bohol Provincial Police Office (BPPO) sa tanan nilang kawani ang paghunong sa implementasyon sa Oplan Tokhang ug Project Double Barrel-Alpha sugod kagahapon, Enero 30.
Apan gitataw sa tigpamaba sa BPPO nga si Sr. Insp. Vincent Dumaguing nga bisan pa gimando ang paghunong sa war on drugs sa tibuok PNP, ipadayon gihapon nila ang pagsikop sa mga maaktohang nisalmot sa aktibidad sa ilegal nga droga. (ecb/PIA7-Bohol)
by admin | Jan 31, 2017 | Headlines, Local News / Bohol Balita
TAGBILARAN CITY, January 31 (PIA)–Ang kagamhanang lokal sa Panglao nimugna ning bag-o lang sa Panglao Resorts Security Officers (PARSO) agi og pagmintinar sa kahusay ug paghugot sa seguridad ilabi na sa mga dugokon nga lugar ug destinasyon sa mga turista sa maong lungsod.
Matud pa ni Mayor Leonila Montero, ilang gihangyo ang tabang sa kapolisan, opisyal sa mga barangay ug hotel ug resort management sa pag-apil sa PARSO nga maoy mopahigayon og security operations sa tibuok adlaw ug gabii.
Ang maong grupo usab ang gitahasan sa pag-monitor sa kadagatan sa Panglao aron pagseguro sa kahilwasan sa daghang turista nga mobisita sa maong lungsod.
Gimugna usab ang PARSO aron itukpaw ang seguridad sa mga delegado sa Association of Southeast Asian Nations (ASEAN) Summit nga gitakdang mobisita sa maong lungsod nga maoy usa sa mga lugar sa nasod diin ipagihayon ang ASEAN meetings.
Ipahigayon sa usa sa mga resort sa maong lungsod ang 10th Meeting sa AHKTA sa buwan sa Abril ning tuig diin gibanabanang dul-an 300 ka delegado ang motambong sa tulo ka adlaw nga kalihokan sa ASEAN Summit.
Ang Pilipinas ang host sa ASEAN Summit 2017 meetings karong tuig diin ang ubang meetings magsugod sa Davao karong buwan ug sa Abril, ipahigayon sa lalawigan sa Cebu ug Bohol.
Ang ASEAN Summit 2017 natunong sa ika-50 nga anibersaryo sa 10-bloc nga nasyon.
Dugang pa ni Montero nga ipadayon gihapon ang PARSO human sa kalihokan sa ASEAN Summit agi usab og pagpangandam sa dagkong aktibidad sa lungsod diin nahimutang ang lokasyon sa New Bohol Airport. (ecb/PIA7-Bohol)
