by admin | Sep 6, 2016 | Headlines, National News
MANILA, September 6 (PIA)–Milagda na sa usa ka memorandum of agreement (MOA) ang Philippine National Police (PNP) ug ang duha ka telecommunications company kagahapon didto sa Camp Crame sa kaulohan.
Gipangunahan ni PNP Chief Ronald “Bato” dela Rosa ang paglagda sa kasabotan kauban ang mga tinugyanan sa duha ka telcos alang sa paggamit sa police quick response hotline nga 2286.
Dungan niini, gipahigayon usab ang unveiling sa marker nga literal nga may bato ug sundang nga nagpakita sa pagtaga sa usa ka sundang sa usa ka dakong bato.
Alang sa pagsumpo sa krimen, mahimong mo-text sa ilang mga concerns ang publiko sa nahisgotang numero nga 2286 apan may P2.50 nga charge ang matag text.
May feature usab kini nga “auto call” kun adunay emergency.
Gawas sa 2286, mahimo usab gamiton ang 911 alang sa pagpangayo og tabang kun adunay emergency alang sa paspas nga pagtubag sa krimen ug pagsumpo sa ilegal nga droga. (ecb/PIA7-Bohol)
by admin | Sep 6, 2016 | Headlines, Local News / Bohol Balita
TAGBILARAN CITY, September 6 (PIA)–Pormal nang gi-deklarar sa Malakanyang nga usa ka regular holiday ang Setyembre 12, isip pagsaulog sa Eid’l Adha o Feast of Sacrifice.
Sa Proclamation Number 56 nga gilagdaan ni Executive Secretary Salvador Medialdea, gi-deklarar nga regular holiday sa tibuok nasod ang Setyembre 12, adlaw nga Lunes.
Kini human gi-rekomendar sa National Commission on Muslim Filipinos ang maong petsa aron isaulog ang obserbasyon sa Eid’l Adha,
Ang Eid’l Adha ang ikaduha sa pinakadakong festival alang sa mga Muslim.
Sinyales kini sa pagtapos sa tinuig nga Hajj pilgrimage sa Mecca. (ecb/PIA7-Bohol)
by admin | Sep 5, 2016 | Headlines, Major Events, National News
MANILA, September 5 (PIA)–Gipagawas sa Malakanyang ning bag-o lang ang duha ka bersyon sa anti-drug advertisement niini.
Matud pa ni Presidential Communications Office (PCO) Kalihim Martin Andanar, tuyo sa maong advertisement nga makuha ang atensyon sa matag pamilyang Pilipino aron makalikay sa paggamit sa ilegal nga droga.
May duha ka bersyon ang advertisement, ang una kalabot sa usa ka amahan nga nagumon sa ginadili nga droga diin gipakita ang daghang mahinungdanong kahigayonan nga wala niya nakauban ang iyang pamilya.
Samtang ang ikaduha nga bersyon usab kalabot sa usa ka inahang Overseas Filipino Worker (OFW) nga perting paningkamot og trabaho sa ubang nasod, samtang ang iyang anak sa Pilipinas tiggamitan sa ilegal nga droga.
Kapin sa duha ka minuto ang full version sa duha ka advertisements ug si Brillante Mendoza ang director niini.
Ang maong mga TV ads makita sa mga TV stations ug mga sinehan sa tibuok nasod. (ecb/PIA7-Bohol)
by admin | Sep 5, 2016 | Headlines, National News
MANILA, September 5 (PIA)–Human ang duguong pagpamomba sa syudad sa Davao, gitambagan sa Malakanyang ang mga Pilipino nga dili mahadlok, apan magpabiling alerto o magbinantayon.
Matud pa ni Presidential Communications Office (PCO) Kalihim Martin Andanar, angay lang nga ipadayon sa publiko ang ilang kinabuhi samtang motabang sa otoridad pinaagi sa pagsumbong sa mga kadudahang aktibidad o kalihokan.
Si Andanar nagkanayon nga karong walay dagway ang kaaway, ang pinakamaayong himuon mao ang magkahiusa ang gobyerno ug katawhan.
Matud pa nga ang gubat sa mga terorista, gubat usab sa tibuok nasod.
Dugang pa sa kalihim, ang mga terorismo nahitabo sa mga wala damha nga higayon mao nga kinahanglang mag-amping gayud.
Sa dihang gipangutana si Andanar kun may kalabotan ba ang pagpamomba sa Davao sa kampanya ni Presidente Rodrigo Duterte batok sa iligal nga droga, miingon kini nga dili ikalimod nga may mga nakaaway nga drug lords ang Presidente nga may igong pondo.
Apan bisan kanunay nga mauban ang mga drug lords sa mga gidudahang suspek, ning higayona, nagtuo si Presidente Duterte nga mas daku ang posibilidad nga terorista gayud ang nagpaluyo niini. (ecb/PIA7-Bohol)
by admin | Sep 5, 2016 | Headlines, Local News / Bohol Balita
TAGBILARAN CITY, September 5 (PIA)–Human sa nahitabong pagpamomba sa syudad sa Davao, naka-red alert dayon ang kapolisan ug militar sa Bohol.
Isip tubag sa gi-deklarar nga state of lawlessness ni Presidente Rodrigo Duterte, ang Provincial Peace and Order Council sa lalawigan sa Bohol nga gipangunahan ni Gob. Edgar Chatto, nihimo na og mga inisyatiba sa pag-proteher sa tibuok lalawigan.
Ang Philippine National Police Bohol Police Provincial Office (PNP-BPPO) ubos sa pagdumala ni Chief PSSupt. Felipe Natividad, naka-full alert na samtang ang Bohol Armed Forces of the Philippines ubos sa pagpanguna nila Col. Arnulfo Matanguihan ug Lt. Col. Jose Dodjie Belloga Jr., naka-red alert na usab.
Sukad niadtong Sabado, nagpahigayon na ang PNP ug AFP og joint check points sa mga napiling estratehikong mga lugar sa probinsiya.
Samtang gi-aghat ni Gob. Chatto ang mga komunidad nga naa sa daplin sa mga baybay sa pagpakig-alayon sa mga tinugyanan kon may mamatikdang wa mailhing mga tawo nga nanunggo sa ilang dapit.
Ubos sa state of lawlessness nga gi-deklarar ni Presidente Duterte, ang mga polis ug militar adunay gahom nga imbestigahan ang mga kadudahang indibidwal ug susihon ang matag lugar. (ecb/PIA7-Bohol)
