by aimee | Feb 28, 2014 | Headlines, National News
MANILA, Feb. 26 (PIA)–Nalabwan na sa Pilipinas ang Guinness World Record nga “Most People to Sign-up as Organ Donor in One Hour.”
Kanhi gikoptan sa India ang maong titulo nga adunay 2,755 donors nga nipasalig isip organ donors sa usa ka lugar sulod sa usa ka oras.
Pinaagi sa sign-up campaign nga “I Am Life Line” sa Department of Health (DOH) ug Philippine Network for Organ Sharing (PhilNOS), nahimo sa mga Pinoy nga malabwan ang record sa India.
Ganinang buntag, kapin sa 3,000 dayon ang natala sa Polytechnic University of the Philippines (PUP) sa Sta. Mesa, Manila ang nagpalista isip donor sulod pa lamang sa tunga sa oras.
Gawas sa one hour record, target usab nga makuha sa mga Pinoy ang pinakadaghang ni-pledge nga mo-donate og organ sa usa ka nasud sulod sa usa ka adlaw.
Apil sa mga nagpahigayon og organ donation sign-up ang Quezon Memorial Circle (QMC); RTMC Hospital sa San Fernando, La Union; Mamba Gym sa Tuguegarao City, Cagayan; JMR Coliseum sa Naga City ug Almendras Gym sa Davao City.
Paaboton na lamang ang pormal nga pahibalo sa mga tinugyanan sa Guinness kalabot sa world record attempt sa organizers. (PIA7-Bohol/ECB)
by aimee | Feb 28, 2014 | Local News / Bohol Balita
TAGBILARAN CITY, Bohol, Feb. 28 (PIA)–Nipasidaan ang City Peace and Order Council (CPOC) batok sa bag-ong modus operandi karon sa pundok sa mga kawatan nga naglibot sa syudad gamit ang Starex van.
Ang maong grupo nigamit sa maong sakyanan nga maoy isalipod atubangan sa tindahan nga ilang lungkabon og didto isakay ang ilang mga kinawat nga gamit ug gamiton kini isip sakyanan sa pag-ikyas.
Nabutyag kini atol sa binuwang tigom kagahapon sa City Peace and Order Council meeting nga gipangulohan ni Tagbilaran City Mayor John Geesnell “Baba” Yap II nga gipahigayon sa Panda Tea Garden sa Dao, ning dakbayan.
Matud pa ni Mayor Yap, ang Bohol Bankers Association mihangyo na usab alang sa dugang ‘police visibility’ o mga polis nga makita sa distrito sa mga magpapatigayon sa dakbayan ilabi na sa Carlos P. Garcia kun CPG Avenue diin nahimutang ang daghang mga bangko.
Gipasalig hinuon ni Mayor Yap nga ang kagamhanan sa dakbayan sa Tagbilaran, magbutang gayud og dugang mga CCTV cameras sa mga nagkalain-laing dapit sa syudad.
Kini agig dugang sa gigamit sa pag-monitor sa kagamhanang probinsyal gikan sa Quick Response Team nga Telephone and Radio System Integrated Emergency Response (TaRSIER 117).
Gibutyag usab ni Mayor Yap atol sa maong tigom nga ang kapolisan sa dakbayan nakadawat og 30 ka bag-ong service firearms gikan sa nasudnong buhatan sa Philippine National Police (PNP).
Samtang si Tagbilaran City Police Chief Jovito Atanacio mi-presentar sa comparative crime statistics alang sa bulan sa Enero ug Pebrero ning tuig sa maong tigom.
Adunay natalang 96 nga gidaghanon sa krimen sa Pebrero, samtang 83 niadtong Enero. Samtang adunay 30 ka nasulbad nga krimen sa Pebrero ug 32 niadtong Enero.
81 ka index crime ang natala sa Pebrero samtang aduna lamang 66 niadtong Enero. Alang usab sa non-index crimes, may natalang 15 sa Pebrero samtang 17 sa Enero.
Ang kapolisan sa syudad adunay 31% crime solution efficiency alang sa bulan sa Pebrero samtang 39% niadtong Enero.
Kabahin sa crime against property, nisaka ang insidente sa karnapping sa Pebrero nga nakatala og 15, itandi sa 4 lamang alang sa bulan sa Enero. (PIA7-Bohol/ECB)
by aimee | Feb 27, 2014 | Headlines, National News
MANILA, Feb. 27 (PIA)–Magbukas og mga oportunidad sa negosyo sa Pilipinas ilabi na sa Mindanao ang pagbisita ni Presidente Benigno ‘Noynoy’ Aquino III sa Malaysia karong adlawa.
Matud pa ni Philippine Ambassador to Malaysia Ed Malaya, 13 ka kumpanya gikan sa Malaysia ang mibisita sa Cotabato City human gilagdaan ang katapusang annex sa Bangsamoro Framework Agreement niadtong Enero.
Tuyo sa mga Malaysian companies nga tan-awon ang mga posibleng investment sa rehiyon sa Mindanao nga nangahulogan og trabaho alang sa mga Pilipino.
Matud pa sa ambassador, taas ang agenda sa state visit ni PNoy nga magduso sa kalinaw ug pag-ugmad sa Autonomous Region in Muslim Mindanao (ARMM).
Tuig 2001 sa dihang nahimong facilitator ang Malaysia sa hisgotan sa kalinaw tali sa gobyerno ug Moro Islamic Liberation Front (MILF) ug padayon pa gihapon ang paghatag niini og suporta sa nasud sa Pilipnas.
“What is important, now that there is a successful conclusion of the peace process, is to transform the support and the goodwill from facilitation of the peace process into concrete economic support measure, so that – in the words of Prime Minister – the former freedom fighters can be transformed into productive farmers,” pahayag ni Malaya.
Dugang pa sa ambassador, gitutokan sa mga negosyanteng Malaysian ang Pilipinas tungod sa natalang paglambo sa ekonomiya niini.
7.2% ang nahimong GDP growth sa Pilipinas niadtong niaging tuig nga ikaduha sa pinakadakung paglambo sa ekonomiya sa Asya ug labing-taas sa tibuok Association of Southeast Asian Nations (ASEAN).
Giingong kini ang hinungdan mao nga daku-daku ang gipaabot nga gidaghanon sa mga negosyanteng moduaw sa ipahigayong business investment forum diin gipaabot ang pahayag ni PNoy. (PIA7-Bohol/ECB)
by aimee | Feb 27, 2014 | National News
MANILA, Feb. 27 (PIA)–Ang Pag-IBIG Fund Board of Trustees, sa pagpanguna sa ilang Chairman nga si Vice-President Jejomar Binay, ning bag-o lang ni aprobar sa Special Program alang sa mga miyembro sa Pag-IBIG nga naapektuhan sa bagyong Yolanda.
Ang maong programa naglakip sa: private-public partnerships kauban ang mga top developers sa mga developing housing projects sa nasud; interest-free home rehabilitation/reconstruction loans alang sa unang 6 ka buwan sa loan ug ang subsidized interest rates alang sa mosunod nga 1.5 ka tuig; 6 ka buwan nga grace period o lugway alang sa bag-ong calamity loans; 6 ka buwan nga moratorium sa amortization payments alang sa existing housing loans apil na usab ang short-term loans sa mga apektadong miyembro.
Kining maong special program agig dugang sa regular programs nga nag-kumpleto sa Special Package nga gitanyag sa Pag-IBIG alang sa mga miyembro niini. Apil na ang calamity loan nga adunay 5.95% interest per annum ug ang assistance sa claim insurance proceeds alang sa mga nangagubang balay sa mga adunay existing housing loans.
Kining tanan agig pagtuman sa mando ni Binay nga angay ang Pag-IBIG adunay mahinungdanong papel sa pagtabang sa mga miyembro niini nga naapektuhan sa bagyo sa pagbangon og balik.
Tungod niini, ang Pag-IBIG nigahin sa kinatibuk-ang P15 bilyon alang sa mga dapit nga naapektuhan sa bagyong Yolanda.
Nigahin usab ang Pag-IBIG og P5.5 bilyon alang sa pag-ugmad sa mga proyekto sa pabalay ug home loans alang sa mga piniling lugar.
Agig pagtabang sa buhatan sa mga miyembro niini sa pagbaton og salapi alang sa uban nilang panginahanglan, nigahin usab sila og P5 bilyon alang sa calamity loans nga adunay ubos nga interest rate nga 5.95% per annum.
Dugangan kini sa ilang P4.5 bilyon nga pondo alang sa regular home financing program alang sa Kabisay-an.
Alang kini sa ilang mga miyembro nga manginahanglang manghulam og labaw pa sa P450,000 alang sa pagpatukod og balik sa ilang balay.
Kini nga programa nagtinguha nga maka-benepisyo sa mga 720,000 ka miyembro sa Pag-IBIG. (PIA7-Bohol/ECB)
by aimee | Feb 26, 2014 | Local News / Bohol Balita, National News
MANILA, Feb. 26 (PIA)–Nipahinumdom ang Department of Eductaion (DepEd) nga himuong yano lamang ang mga himuong seremonya sa graduation sa sunod nga bulan.
Pinaagi sa DepEd Order No. 9 s. 2014, gipahibalo ni Education Secretary Bro. Armin Luistro ang tema sa pagtapos karong tuig nga: “Hindi Natitinag ang Pusong Pilipino.”
Matud pa sa kalihim, bisan ang usa ka graduation nangahulogan og kalampusan, giingong dili angay ipakita sa mga engrandeng suot ug venue ang leksyon nga angay itudlo sa mga estudyanteng motapos.
Matud pa nga mas mahinungdanon ang mensahe nga pagka-makanasudnon, kamaayo ug kalig-on.
Base sa school calendar SY 2013-2014, kinahanglang himuon ang graduation sa ika-27 ug ika-28 sa Marso ning tuig.
Subli usab nga nipahinumdom ang DepEd nga bawal ang pagpangayo og graduation fees o bisan unsang matang sa kontribusyon sa mga molampos nga tinun-an. Wala usab gitambag sa buhatan ang pagpahigayon og mga graduation balls ug uban pang closing activities. (PIA7-Bohol/ECB)
