by anyajulia | Oct 9, 2008 | Headlines, National News
PANGUNAHAN sa Department of Justice (DOJ) ang kampanya batok sa human trafficking pinaagi sa pagpatuman sa Republic Act 9208, o ang Anti-Trafficking in Persons Act of 2003.
Mismo sa DOJ Usec. Ricardo R. Blancaflor mangulo sa Inter-Agency Council batok sa Trafficking (IACAT).
”Tumong nato nga ipakatap ang kasayuran ug pagpangandam kabahin sa kampanya abtok sa pagpalusot ug tawo, ug agnihon ang tabang sa mga opisyales nga nalambigit sa mga proseso sa pagpagawas sa trabahantes,” matud ni Blancaflor.
Ikauban sa DOJ sa konseho mao ang Department of Social Welfare and Development (DSWD), Department of Foreign Affairs (DFA), Department of Labor and Employment (DOLE), Bureu of Immigration, National Bureau of Investigation (NBI), Philippine National Police, Philippine Overseas Employment Administration (POEA) ug ang National Council on the Role of Filipino Women (NCRFW). (PIA/rachiu)
by anyajulia | Oct 9, 2008 | Headlines, National News
GIAWHAG na ni Department of Health Secretary Francisco Duque III ngadto sa mga natungdang ahensya sa kagamhanan sa pagpasaka sa tukmang sumbong batok sa mga nalambigit sa pagpalusot sa mga gatas nga kontaminado sa melamine.
Gitumong ni Duque III ang Department of Trade and Industry (DTI), Bureau of Customs ug ang mga Chinese embassy officials paglihok aron kapa-sakaan na ug tukmang sumbong ang mga nalakip niining palusot.
Matud niya, kinahanglang masugdan na ang sumbong kriminal ug administratibo batok sa mga natungdan.
Ang pagpalusot sa kontamindao nga gats nahisupak sa Article 18 Section B sa Consumer Act, ug kili mahimong gamiton bisan ngadto sa masakpang nagbaligya ug nagtumod sa mga gatas ug produkto gikan niini nga namatud-ang kontaminado sa kemikal nga melamine. (PIA/rachiu)
by anyajulia | Oct 9, 2008 | Headlines, National News
UGMANG adlawa, ibutyag na usab sa Departamento sa Kasanihan (Department of Health) ang laing listahan sa mga gatas ug produkto gikan niini nga gikompra gikan sa Tsina nga may kontaminsayon sa kemikal.
Matud ni Kalihim Francisco Duque III, ang Bureau of Food and Drugs (BFAD) mipahigayon na sa pagtuon aron hibal-an hain sa kapin sa 200 ka brand sa gatas ug produktong hinimo gikan niini nga may kemikal nga melamine.
Una na nga gipagawas sa DOH BFAD ang pasiunang listahan sa mga produktong hingpit nga gipangbunlot sa merkado. Ang Greenfood Yili Fresh Milk ug Mengniu Drink namatud-ang kontaminado sa melamine.
by anyajulia | Oct 9, 2008 | Headlines, National News
MISALIG si Presidente Gloria Macapagal-Arroyo nga ang ekonomiya sa Pilipinas ma-ulian na sumala sa una na nga gitagna alang sa sunod tuig.
Kini, matud pa, subay sa lig-on nga haligi sa macro-economics, nga napundar na sukad pa niadtong 2001 aron sagubangon ang mga hulga nga dala sa global nga ekonomiya.
Niini, bisan pa sa epekto sa pagkapalyar sa ekonomiya sa Estado Uidos, ang posiyon sa Pilipinas isip nakapangandam na nga daan, wala motibugsok sama sa nasinati sa ubang nasud.
Sa pagpundo alang sa imprastraktura, sama sa mga tulay, tugpahanan, pantalan, telekomunikasyon, napalig-on usab sa nasud ang ekonomiya nga kaya mosagubang sa pagkatay-og.
Hinuon, kamolo pa ang mga lider sa pagpagamay sa epekto sa inflation, nga miabot gayud ug sa paghimog panalipod sa mga pundok ug sector nga apektado.
Dugang pa, gisaad sa Presidente nga maghimo pag daghang kapanarbahoan, tul-iron ang pamuhis ug mangaghat pag mamumuhunan alang sa nasud. (PIA/rachiu)
by anyajulia | Oct 9, 2008 | Headlines, National News
MILAUM ang Malacanyang nga ang napalusot nga $700 bilyones nga pundo sa kagamhanan sa Estados Unidos sinugdanan na sa pagbalik sa kompyansa sa mga mamumuhunan sa ekonomiya.
Hinuon, pasalig sa Palasyo, dili moundang ang nasud pagpanalipod aron makalahutay sa mga epekto sa krisis pinansyal nga nakaapekto sa tibuok kalibutan.
Matud ni Press Secretary Jesus Dureza “Magpadayon ang Pilipinas sa pagpangandam sama sa ubang mga nasud aron makalingkawas niining nagsamok nga krisis.
Kahinumduman nga una na nga gisalikway sa US Congress ang Emergency Economic Stabilization Act of 2008 apan sa ikaduhang pagboto, gipalabang ra gihapon ang labing dako nga tabang pinansyal sa kagamhanan sukad sa 1935 aron lamang luwason ang ekonomiya sa Estado Unidos.
Kay ang United States mao may usa sa mga labing dako nga angkatanan sa Pilipinas, gilantaw na karon ang pagbukas sa palit gikan sa Tsina ug India. (PIA/rachiu)
