by anyajulia | Sep 11, 2008 | Headlines, National News
Gipasidunggan ni Presidente Gloria Macapagal-Arroyo ang mga kawani sa kagamhanan tungod sa ilang gihimo isip tulay sa kagamhanan ug sa katawhan.
Ang maong pasidungog, nahiha-um sa pagsaulog sa ika 108 anibersaryo sa Serbisyo Sibil o Civil Service Commission (CSC); sa ilang tema: “Republic Service – Kabalikat ng Bayan sa Panahon ng Paghamon.”
Gipatin-aw sa Presidente nga ang mga kawani sa kagamhanan, nahimong importanteng tulay nga misumpay, aron mapaduol ang katawan sa kagamhanan.
Tungod niini, angayan nga hatagan sila og dakong pasidungog sa ilang sakripisyo aron pag-asenso sa mga katawhan sa nasud, dugang sa presidente.
Apil niini ang ilang kontribusyon aron mapalambo ug mapalig-on ang ekonomiya sa nasud, lakip na usab ang ilang sakripisyo aron makab-ot ang kahapsay ug kalinaw sa nasud.
Di pa lang dugay gi-tuman ni Presidente Arroyo ang iyang sa-ad nga saka-an ang suweldohan sa mga kawani sa kagamhanan. (PIA/Bohol)
by anyajulia | Sep 11, 2008 | Headlines, National News
Si Major Gen. Nehemias Pajarito, Commanding General, sa 1ID, mapasaligon nga ilang ipatuman ang palisiya sa Armadong Kusog nga respetahan ang Ramadan, bisan kon gipadayon ang walay pu-as nga nga pag-gukod ug pagpukan sa mga rebeldeng MILF nga gipamunuan ni Kumander Bravo.
Gi-awhag usab ni Gen. Pajarito ang mga sumusunod ni Bravo nga mo-ampo sa sabakan sa balaud tungod kay sila gi-ilad lamang sa sayop nga pagtu-o ug panulun-an. Kon ang inyong tinguha mao ang kalinaw ug panaghi-usa tali sa Muslim ug Kristiyano, amo kamong gi-awhag mo-surender, dugang ni Pajarito.
Gipasalig usab sa Heneral nga sa pag-gukod sa mga rebelde, ipatuman gayud sa AFP ug PNP nga walay katungod sa mga katawhan nga mayatakan. (PIA-Bohol)
by anyajulia | Sep 11, 2008 | Headlines, National News
Gibutyag ni Police Chief Inspector Arneil Catarata, Hepe sa PNP, Operations and Intelligence sa Iligan City, nga midaghan ang impormasyon nga ilang nadawat kon hain nagtago ang rebeldeng lider sa MILF nga si Abdulrahman Macapaar alias Kumander Bravo.
Kini human gisaka-an ang suhol og P10 milyones sa bisan unsang impormasyon aron madakpan sa Kumander Bravo. Hinu-on, ila pang susihon ang kamatu-oran sa maong impormasyon.
Gipanghimakak usab ni Major Catarata nga adunay mga `bounty hunters’ nga mi-apil sa pagtugis sa mga rebelde. Kini ilegal ug wala tugoti sa Armadong Kusog, dugang ni Catarata.
Maski gamay lang apan mahinungdanong impormasyon nga modangat sa pagdakop kong Bravo, buhi o patay; mao ray among gikinahanglan aron madawat sa P10 milyones, hagit ni Catarata. (PIA-Bohol)
by anyajulia | Sep 11, 2008 | Headlines, National News
SUKWAHI sa gikahadlokang pagkatap sa mga armas sa Mindanao kon tugotan ang mga police auxiliary units nga malakip sa kombate batok sa mga rebelde, giklaro ni Interior Secretary Ronaldo Puno nga dili sila kon dili ang mga police recruits sa Mindanao nga naa pa sa Field Training Programs ang ikauban sa kagamhanan.
Sila karon ang prayoridad sa pagsumpo sa dugang kagubot nga itisok unya sa mga rebeldeng Moro Islamic Liberation Front (MILF), matud ni Puno atul sa usa ka workshop sa Mindanao.
Gani, butyag niya nga menosan na sa kapolisan ang pagpang recruit sa buot moboluntaryo kay anaa may dul-an sa usa ka libo ka mga gusto mag pulis nga nailawom na sa training.
Dugang pa niini, dili padalhon ug armas ang mga Civilian Volunteer Organizations (CVOs) kay ang ilang buhat adto na magtutok sa pagpahiuli sa mga lugar nga nangaguba sa milabayng mga kasamok. (rachiu/PIA)
by anyajulia | Sep 11, 2008 | Headlines, National News
GIENDORSO sa National Police Commission (Napolcom) si Deputy Director General Jesus Versoza isip sunod nga hepe sa Philippine National Police (PNP).
Pinaagi sa usa ka pahina nga resolution, ang Commission en banc sa NAPOLCOM mibutyag nga si Versoza dunay tukma nga katakus nga modumala sa pinakataas nga posisyon sa PNP.
Kini usab maoy unod sa pag-endorso nila ni Versoza ngadto kang presidente Gloria Macapagal Arroyo pinaagi ning Resolusyon 2008-449.
Si Versoza mopuli kang Gen. Avelino Razon, kinsa moretiro sa katungdanan sa Septembre 27.
Kon matuman ang edorsement, si Versoza maoy ika 15 nga PNP Chief human ang pulis nahimuwag sa Philippine Constabulary- Integrated National Police (PC-INP) niadtong 1991. (rachiu/PIA)
