by boholbalita | Apr 23, 2010 | Election 2010, Headlines, Local News / Bohol Balita
Nagpaabot si presidential candidate Senator Manny Villar sa Nacionalista Party sa desisyon ni Gob. Erico Aumentado aron motapo iyang grupo sa di ma moabot ang adlaw sa piniliay karong Mayo 2010.
Kini maoy gipadayag ni Villar dihang gipangutana sa mga sakop sa media didto sa Bohol Tropics atol sa iyang pagduaw sa lalawigan sa Bohol niadtong Miyerkulis.
Matud ni Villar, nga iyang suod nga higala si Aumentado dihang siya pa ang speaker sa balay balauran atol sa administrasyon ni kanhi presidente Joseph Estrada ug abli pirmi ang iyang pultahan kun mopadayag na kini nga molukso sa iyang partido.
Apan gibutyag ni Villar nga kasagaran sa mga mayor nga niluhar kaniya pulos mga kaalyado sa gobernador hinungdan nga dili gayud kalikayan nga magduda ang mga katawhan nga siya gayud ang gisuportahan niini. “Basahin mo ang mga mayor, di ba mga supporter sila (Aumentado)”, asoy pa ni Villar.
Si Aumentado kinsa sakop sa administrasyong Lakas-Kampi-CMD nidagan isip kongregista sa ikaduhang distrito sa Bohol diin siya nitukod sa iyang grupo nga Lakas-Aumentado Wing human sa ilang panagbangi sa gubernatorial candidate, Kongresista Edgar Chatto ug Kongresista Ondoy Cajes.
Niining bag-o nitukod na usab ang ang grupo ni Aumentado ug Herrera ug Grand Alliance nga gikalungkaban sa mga ubang partido sama sa Liberal Nationalist People’s Coalition aron kontrahan ang tinguha ni Chatto sa pagka-gobernador.
Ang gobernador gihimong guest candidate nila bise gobernador Herrera ug manlalaban Tomas Abapo kinsa magpapili isip gobernador ug bise gobernador sa umaabot nga eleksyon. (Andy Nalzaro)
by boholbalita | Apr 23, 2010 | Headlines, Local News / Bohol Balita
Duha ka gidudahang tigpahuyot sa ilegal nga drogang shabu ang nadakpan sa gihimong ronda sa bahan sa Special Weapons and Tactics (SWAT) sa Bohol Provincial Police office didto sa C.P.G. North Avenue, duol sa Coca Cola Plant dakabayan sa Tagbilaran kagahapon sa udto.
Ang mga nadakpan nailhan nga sila si Gabriel Lopez, nagpuyo sa Capitol Valley, Barangay Dao ning siyudad ug Raul Mabao, taga Upper dela Paz Cortes, Bohol, pulos hingkod ang pangedaron ug pulos minyo.
Nasayran sa taho nga ang ginsakpan sa SWAT ubos sa kamanduan ni Chief Inspector Nicomedes Olaivar nipahigayon ug usa ka search warrant nga gipagula ni Maghukom Fernando Fuentes III sa Regional Trial Court Branch 49 nga nakabase sa siyudad batok sa mga suspek didto sa ilang buhatan sa Santi Ventures Inc.
Nasakmit sa maong buhatan mao ang usa ka medium size sachet nga gidudahang dunay shabu, lima ka sachet nga gituhuang may shabu residue lakip na ang mga shabu paraphernalia, tulo ka Nokia cellphone ug salaping mokabat ngadto sa P2,000. Gipaslak sa detention cell didto sa Kampo Dagohoy ang duha ka suspek. (Andy Nalzaro)
by boholbalita | Apr 23, 2010 | Headlines, Local News / Bohol Balita
Naligo sa kaugalingon niyang dugo ang usa ka pintor kinsa napalgan nga wala nay kinabuhi human gidunggab ug gigugol sa liog sa wala mailhing suspetsado didto sa Barangay Canjulao,Jagna Bohol kagahapon sa buntag.
Napalgan ang patay’ng lawas sa biktima nga si Angelo Cadalina alias Aga,55 anyos,ulitawo ug nagpuyo sa samang dapit mga alas 6 sa buntag diin dunay daghang samad dinunggaban sa lawas ug gigugol pa ang liog.
Sigun sa pagsusi sa Jagna Police Station nga sa wala pa mahitabo ang maong krimen, nakit-an ang biktima nga nakig-inom sa iyang mga higala sa usa ka tindahan niadtong Miyerkulis sa gabii ug niuna kini sa pagpauli sa ilang pinuy-anan.
Wala pa mahibaw-i sa mga imbestigador kun unsay motibo sa maong insidente ug kinsa ang responsable niini human walay testigo ang nidangop sa buhatan sa Jagna PNP. (Andy Nalzaro)
by boholbalita | Apr 22, 2010 | Headlines, Local News / Bohol Balita
Tulo ka mga binilanggo kinsa adunay mga bug-at nga mga kaso sa humkuman ang nakapuga pinaagi sa paguba sa barbed wire ug nilukso sa gawas sa compound sa Bohol District Jail didto sa barangay Cabawan, dakbayan sa Tagbilaran niadtong Domiggo sa kaadlawon.
Nailhan ang mga suspetsado nga sila Cayo Olandria, 31-anyos, taga-Sitio Tuhop, barangay Canulin, Candijay Bohol kinsa nag atubang sa kasong rape; Enrico Melencio, alias Ikong, 21-anyos, taga Barangay Panghagban, Buenavista, Bohol kinsang nag atubang sa kasong murder; ig si Julito Gamolo, alias Junjun, 32-anyos, nagpuyo sa barangay Ilijan, Inabanga, Bohol nga adunay kasong rape ug robbery.
Nasayran sa taho nga ang insidente nahitabo pasado alas 4 sa kabintagon sa dihang nadiskobrehan kini ni Senior Jail Officer Irene Kapirig nga didto sa post number 3 niagi ang maong mga suspek pinaagi sa pagwiwi sa barbed wire ug nanglayat ngadto sa gawas.
Si Supt. Felixberto Jagurin, jail warden sa Bohol District Jail, kanhi nailhan nga Bohol Detention and Rehabilitation Center ni order na sa usa ka manhunt operation aron sa pagsikop sa maong mga pugante. (Andy Nalzaro)
by boholbalita | Apr 22, 2010 | Local News / Bohol Balita
Alicia- Naospital ang usa k ginang human gitabangan ug lugos sa tulo ka mga lalaki nga iya rang silingan nga giingong naa sa ubos sa impluwensiya sa makahubog nga alak didto sa barangay Poblacion, Alicia, Bohol niadtong nakalabay nga semana. Giila sa kapulisan ang mga suspetsado nga sila Renato Balahay kinsa paryente sa bana sa biktima, usa ka Bernado Libres ug Ambrosio Libres.
Nasayran sa taho nga ang biktima nga taguon lamang sa ngalan na Isabel, 37-anyos, minyo giguyod sa mga suspetsado mga ala-una sa kabuntagon niadtong Martes (Abril 13) ug gidala sa basakan diin didto gitabangan ug lugos. Sigun sa taho nga ang biktima gidala didto sa Candijay Medicare Hospital sa lungsod sa Candijay aron patambalan ug nahibaw-an nga duna kini mga bun-og sa iyang lawas, usa ka kissmark sa iyang li-og og hugaw sa lalaki nga nagpamatuod nga biktima kini sa pagpanglugos. Padayon pang gisusi sa mgakapulisan sa Alicia ang nahitabo.
