by boholbalita | Mar 26, 2010 | Local News / Bohol Balita
PATAY ang usa drayber sa motorsiklo human naka-crash ang iyang gimanehoan human nisuway sa pag-overtake og laing motorsiklo didto sa nasudnong dalan sa barangay San Vicente, Dagohoy, Bohol niadtong Dominggo sa hapon.
Biktima nailhan nga si Wilson Granada, 28-anyos, minyo, nagpuyo sa barangay Babag sa samang lungsod. Nakaangkon og grabeng samad sa nagkadaiyang parte sa iyang lawas ug gideklarang dead on arrival kun DOA dihang nadangat sa Congressman Simeon Toribio Memorial Hospital didto sa lungsod sa Carmen.
Nahitabo ang insidente mga alas 4 sa hapon samtang ang biktima nagmaneho sa usa ka Honda XRM 125 kolor pula nga may plaka numero 6775 GL nga wala nagsul-ob og crash helmet paingon sa direksiyon sa barangay Poblacion dihang pag-abot sa nahisgutang dapit sa utlanan sa Kilometro 150 ug151 , nisuway sa pag-overtake sa usa ka Ramjet 125 kolor asul nga motorsiklo nga gimanehoan ni SDan Mark Mahumot, 15-anyos, taga-barangay San Vicente apan nakasugat og dako nga sakyanan ug aron makalikay nga mabanggaan iyang gisuwayan og sipa ang katapad nga motorsiklo nga niresulta sa iyang pagkatumba.
Matud sa taho nga si Mahumot nakaangkon lamang og gamay nga garas sa lawas. (Andy Nalzaro)
by boholbalita | Mar 26, 2010 | Local News / Bohol Balita
DUHA ka wala mailhing armadong lalaki nitulis sa usa ka estasyon sa gasolinahan ug nakasakmit og dakong kandidad sa salapi didto sa barangay Poblacion, Panglao, Bohol niadtong Dominggo sa gabii.
Nasayran sa taho nga ang insidente nahitabo pasado alas 7 sa gabii samtang usa ka Honda XRM nga kolor abohon nga dunay sakay nga duha ka tawo nagpasumangil nga motubil sa Petron Gas Station nga gipanag-iyahan ni Reynado Aspirin, taga-barangay Tangnan sa samang lungsod.
Matud sa taho nga usa sa mga suspetsado nition og usa ka mubo nga pusil ngadto sa kahera nga nailhan nga si Jackielou Lusterio ug pugsanong gikuha ang salapi nga mokabat ngadto sa P70,000.
Mga suspetsado nisibat paingon sa wa mahibaw-i nga direksiyon.
Sigun sa taho sa Panglao Police Station nga kini maoy unang hitabo sa pagpanulis nga natala sa kapulisan ning tuiga. (Andy Nalzaro)
by boholbalita | Mar 17, 2010 | Local News / Bohol Balita
NAILHAN na sa mga imbestigador sa kapulisan sa Getafe ang responsable sa pagpamusil didto sa barangay Sto. Niño niadtong Biyernes sa gabii diin nikalas kini og usa ka kinabuhi ug nakasamad og laing duha.
Si PO3 Bonifacio Pedoche sa Getafe Police Station nagbutyag nga duna na silay suspek nga gisundan apan dili una nila ibutyag ang ngalan niini aron dili maguba ang gihimo nila nga imbestigasyon.
Matud ni Pedoche nga ang daang panagdumot ang hinungdan sa pagpusil patay sa biktima nga si Thomas Rosagaran ug napagan lamang ang usa niya ka higala nga si Bobong Torreon ug ang 6-anyos nga batang lalaki nga si Jesler Turtoga.
Sayo niini, si Rogaran, 24-anyos, taga-barangay Sto. Niño ug si Torreon, 24-anyos, nagpuyo sa Campao Oriental, pulos ulitawo gipamusil samtang nangaon og panihapon mga alas 10 sa gabii.
Si Turtuga kinsa nitan-aw og salida sa tv naigo sa saag nga bala ug nabuak usab sa bala ang picture tube sa maong tv. (Andy Nalzaro)
by boholbalita | Mar 17, 2010 | Local News / Bohol Balita
NASUNOG ang usa ka ancestral house gumikan sa faulty electrical wiring didto sa Purok 2, barangay Libaong, panglao, Bohol kagahapon sa buntag.
Nasayran sa taho nga ang kalayo nilamoy sa maong balay nga gipanag-iyahan ni Proserfina Maghamil diin hinimo kini sa karaan nga kahoy mga alas 9:30 sa buntag.
Nakontrola ang kalayo mga alas 10 sa buntag human nangabot ang firetruck sa Bureau of Fire Protection kun BFP.
Kini maoy ikaupat nga insidente sa sunog sa lalawigan sa Bohol sud sa selebrasyon sa Fire Prevention Month.
Gisusi pa sa mga fire investigator ang anggulo nga faulty electrical wiring ang malagmit nga hinungdan sa insidente.
Walay gikatahong naangol sa tunga sa oras nga sunog samtang wala pa matino ang kinatibuk-ang danyos sa maong hitabo. (Andy Nalzaro)
by boholbalita | Mar 17, 2010 | Local News / Bohol Balita
GIDUDAHANG runner sa ilegal nga sugal nga suertres nadakpan human kini nasakpan sa akto nga nangolekta sa taya sa sugal didto sa Sitio Lanao, barangay Dao, dakbayan sa Tagbilaran niadtong milabay nga gabii.
Suspetsado nailhan nga si Eric Gastardo, 38-anyos, ulitawo, taga-barangay Manga ning siyudad.
Matud sa taho nga ang suspek nasakpan sa akto sa mga sakop sa Special Operation Group kun SOG sa Bohol Provincial Police Office nga nakabase sa Kampo Dagohoy nga nangolekta og taya nga mga salapi ug tally sheets gikan sa usa ka usher sa naasoy nga ilegal nga sugal.
Nabawi gikan sa iyang posisyon mao ang salapi nga mokabat ngadto sa P1, 608 nga gituohang taya, 23 ka tally sheets sa surtres nga penetsahan og Marso 9, 2010 ug uban pang mga paraphernalia.
Gikustodiya ang natumbok nga suspetsado sa SOG samtang giandam pa ang tukmang sumbong batok kaniya sa piskaliya. (Andy Nalzaro)
