by boholbalita | Mar 6, 2010 | Election 2010, Local News / Bohol Balita
Madasigon nga gisugat sa katawhang Bol-anon kagahapon sila si presidentiable Senador Simeon Benigno “Noynoy” Aquino III ug vice-presidentiable Senador Mar Roxas II atol sa ilang hamubong pagduaw sa duha ka mga lokal nga mga istasyon sa radyo sa dakbayan sa Tagbilaran kagahapon.
Kuyog nila Aquino ug Roxas sa partidong Liberal mao sila si gubernatorial candidate, Cesar “Buboy” Montano, kanhi Dep Ed Supt., Dr. Elpidio Jala kinsa nilansad sa pagka-bise gobernador ug Konsehal Edgar Kapirig nga modagan sa pagka-kongresista sa unang distrito sa Bohol.
Si Aquino ug Roxas dihang nahinabi sa mga tigbalita nibutyag nga ilang gikalipay og dako nga daghan sila og mga dumadapig kinsa naghulat kanila sa gawas sa sibyaanan sa dyTR diin nakahimo kini og dyutay nga trapik sa dalang J. Borja.
Pagkahuman sa ilang pagbisita sa duha ka estasyon, nideretso sa provincial headquarter sa LP didto sa dalan C.P.G. North Avenue atbang sa governor’s mansion.
Gibutyag ni Aquino nga mobalik sila ni Roxas inigsugod na sa kampanya sa lokal karong Marso 26 diin dunay dakong pagahimuon rally sa siyudad ug gieskedyol pa ang maong dakong kalihukan.
Si Aquino ug Roxas niabot sa siyudad mga alas 2 sa hapon sakay sa usa ka pribadong abyon ug nigikan mga alas 4 sa hapon paingon sa dakbayan sa Dumaguete alang sa dakong rally sa gabii. (Andy Nalzaro with reports from Edward Guyano)
by boholbalita | Mar 6, 2010 | Local News / Bohol Balita
GIPASAKAAN na og sumbong didto sa piskaliya ang usa ka 19-anyos nga lalaki kinsa maoy gitumbok nga nagtigbas patay sa iyang uyoan didto sa Sitio Silab, barangay Abilihan, Garcia-Hernandez, Bohol.
Nag-atubang sa sumbong nga homicide mao si Elmer Balaba, ulitawo ug nagpuyo sa samang dapit.
Si Balaba maoy gitudlo nga maoy responsable sa pagtigbas patay kang Nestor Balaba, 53-anyos, minyo niadtong Sabado sa alas 6:30 sa buntag.
Sigun sa taho giatangan sa biktima ang maong suspetsado ug nagakalalalis nga niresulta sa pagtinigbasay sa duruha.
Nakaangkon og daghang samad tinigbasan sa ulo ang biktima nga maoy hinungdan sa iyang kamatayon.
Ang suspetsado kasamtangang gipaslak sa Garcia Hernandez PNP lock-up jail. (Andy Nalzaro)
by boholbalita | Mar 6, 2010 | Local News / Bohol Balita
GIBUHIAN na sa kapulisan ang amahan sa usa ka 7-anyos nga batang babaye kinsa gilugos ug gipatay lakip na ang usa ka silingan niini didto sa lungsod sa Antequera.
Si SPO2 Eleuterio Aleria sa Antequera Police Station nibutyag sa Bohol Balita nga si Artemio Baldisco, amahan sa biktima nga si Arriane Kaye Bulig ug silingan nga is Rogelio Renegado, 33-amyos, ulitawo gibuhian niadtong nakalabay nga Lunes.
Matud ni Aleria nga himnuon ang duruha nga state witness sa maonk kaso samtang ang gitumbok nga mnaoy nibuhat sa mangilngig nga krimen nga si Emilio Panillon padayon pang gipangita sa kabukiran sa maong lungsod.
Sayo niini, ang biktima napalgang patay niadtong Pebrero 25 sa alas 6 sa buntag sa iyang amahan diin dunay daghang samad sa ulo ug bun-og sa iyang nawong human gilugos.
Nahibaw-an usab sa pakisusi sa municipal health officer nga dunay hugaw sa lalaki ang nakuha sa kinatawo sa biktima ug nagkadugo usab kini.
Sa wala pa mahitabo ang krimen, nag-inom ang amahan ni Arriane kuyog sa duha ka mga nahisgutang mga silingan didto sa pinuy-anan ni Baldisco. (Andy Nalzaro)
by boholbalita | Mar 6, 2010 | Local News / Bohol Balita
PATAY ang usa ka ilegal nga mangangisda human nabuthan sa iyang dala nga dinamita samtang nanagat didto sa kadagatan sa barangay Pandanon, Getafe, Bohol kagahapon sa buntag.
Biktima nailhan nga si Antonio Cabardo, hamtong ang panuigon, minyo ug nagpuyo sa mao nga lugar Nakaangkon ang biktima og daghang samad ug angol sa kalawasan hinungdan sa iyang kamatayon.
Nasayran sa taho nga samtang ang biktima ilegal nga nanagat sa kadagatan sa naasoy nga barangay mga alas 10 sa buntag dihang ang dinamita nga iyang gigunitan aksidenteng nibuto ngadto iyang kamot samtang padung na unta kining ilabog sa dagat.
Narikober sa niresponding mga sakop sa Getafe Police Station ang patay’ng lawas sa natumbok nga biktima mga alas 12:25 sa hapon kagahapon ug gihatud na kini sa iyang pinuy-anan.
Sigun sa pakisusi sa Getafe PNP nga ang biktima ilado na sa ilang lugar gumikan sa iyang ilegal nga pamaaagi sa pagpanagat pinaagi sa paggamit og dinamita. (Andy Nalzaro)
by boholbalita | Mar 1, 2010 | Local News / Bohol Balita
GIANDAM na sa kapulisan ang sumbong nga pagpanglugos batok sa usa ka ulitawo nga gitumbok nga maoy nilugos sa usa ka babaye nga may diperensiya sa pangisip.
Nasayran sa taho nga giandam na sa kapulisan sa Maribojoc ang sumbong nga ipasaka didto sa piskaliya batok sa suspetsado nga si Adelo Acero, 38-anyos, nagpuyo sa barangay San Roque, Maribojoc, Bohol.
Sayo niini, ang biktima nga taguon lamang sa ngalang Trixie, 21-anyos gikatahong gipasakay sa maong suspek sa iyang motorsiklo paingon sa siyudad sa Tagbilaran niadtong Miyerkulis sa gabii.
Matud sa taho nga pagkahuman niini, giuli ang biktima sa suspek sa gipuy-an niini sa usa ka dapit sa Maribojoc apan nakamatikod ang inahan niini nga nabiktima sa pagpanglugos hinungdan nga nagpatabang kini sa mga sakop sa Maribojoc Police Station.
Nasikop ang gitudlo nga suspetsado ug kasamtangang gibilanggo didto sa Maribojoc PNP detention cell. (Andy Nalzaro)
