by boholbalita | Mar 1, 2010 | Local News / Bohol Balita
GRABENG naangol ang usa ka 68-anyos nga babaye human aksidenteng nabanggaan og motorsiklo samtang ang biktima nisuway sa pagtabok sa pikas nga bahin sa nasudnon dalan didto sa Poblacion Ondol, Loboc, Bohol kagahapon sa buntag.
Biktima giila nga si Merlita Priete, minyo ug nagpuyo sa barangay Bagumbayan sa maong lungsod. Nakaangkon ang biktima og mga bali sa iyang walang siko ug walang bahin sa iyang gusok ug gioperahan
sa Gov. Celestino Gallares Memorial Regional Hospital sa dakbayan sa Tagabilaran.
Nahitabo ang insidente pasado alas 8 sa buntag samtang nagdagan ang usa ka motorsiklo nga Honda Bravo nga nagtangag sa plaka numero 8005 GR ug gimanehoan ni Oliver Jala, 22-anyos, ulitawo, usa ka construction worker, taga-Sitio Soso, barangay Villaflor sa samang lungsod padulong sa sentro nga bahin dihang pag-abot sa maong dapit, kalit nga nitabok ang biktima sa karsada paingon sa merkado publiko.
Wala na makapreno ang drayber sa iyang ug iyang napunggitan ang maong biktima.
Nisurender didto sa Loboc Police Station ang maong drayber human sa insidente. (Andy Nalzaro)
by boholbalita | Mar 1, 2010 | Local News / Bohol Balita
USA ka bading nga gidudahan nga tigpayuhot sa ilegal nga drugang shabu nadakpan sa gihimong ronda sa bahan sa Philippine Drug Enforcement Agebcy kun PDEA-Bohol ug Loboc Police Station didto sa pinuy-anan niini sa Poblacion Sawang, Loboc, Bohol niadtong Biyernes sa hapon.
Suspetsado nailhan nga si Romeo Incon, 47-anyos, ulitawo.
Nasayran sa taho nga ang mga sakop sa PDEA pinangoluhan sa hepe niini nga Intelligence Officer 2 Earl Rallos ug Loboc PNP ubos sa hepe niini nga si Senior Inspector Antonio Gujelde nironda sa balay sa suspek pinasikad sa search warrant nga gipirmahan ni Maghuhukom Fernando Fuentes III sa Regional Trial Court Branch 49 nga nakabase sa dakbayan sa Tagbilaran.
Nasakmit gikan sa pinuy-anan ni Incon mao ang usa ka gamay nga sachet nga gituohang dunay shabu residue ug mga shabu papahernalia.
Gikustodiya ang natumbok nga suspetsado didto sa buhatan sa PDEA apan nahibaw-an sa taho gikan sa maong buhatan nga gi-release na kini kagahapon human nakabayad sa piyansa nga mokabat ngadto sa P200,000 didto sa maong hukmanan . (Andy Nalzaro)
by boholbalita | Mar 1, 2010 | Local News / Bohol Balita
Amahan sa biktima ug usa ka silingan gilakip nga mga suspek
samtang laing usa wa pa madakpi
GILUBONG kagahapon ang 7-anyos nga batang babaye nga gipatay human gilugos didto sa pinuy-anan sa biktima sa Sitio Calumbangon, barangay Bantolinao, Antequera, Bohol.
Si PO2 Bernard Erojo sa Antequera Police Station nibutyag sa Bohol Balita nga ang patay’ng lawas ni Arriane Kaye Bulig gilubong sa sam-ang nga Katoliko didto sa maong lungsod diin tinambungan kini sa iyang mga kaparyentihan ug mga silingan.
Ang amahan sa biktima nga si Artemio Baldisco mao lamang ang nakakuyog sa paghatud sa patay’ng lawas ni Arriane ngadto sa sementeryo gumikan kay ang iyang inahan atua man sa kaulohan.
Si Baldisco ug ang inahan sa biktima dili kini kasado sigun sa impormasyon sa kapulisan.
Nibutyag usab si Erojo nga si Baldisco gikonsiderar usab nga suspek sa krimen kauban sa unang nadakpan nga si Rogelio Regenado alias Tata, 33, ulitawo ug gipaslak sa bilangguan sa Antequera PNP. Ang laing usa mao ang nisibat nga suspetsado nga si Emilio Panillon, 40-anyos, ulitawo ug silingan sa maong biktima.
Si Panillon nagpabiling wa pa madakpi ug padayon pang gipangita sa mga sakop sa Antequera PNP.
Sayo niini, si Bulig napalgan sa iyang amahan nga walay nay kinabuhi mga alas 6 sa buntag niadtong Huwebes didto sa sud sa iyang lawak.
Sa wala pa mahitabo ang krimen, si Panillon ug Renegado kauban ni Baldisco nag-inom didto sa iyang balay mga alas 9 sa gabii. Si Baldisco nipahayag nga nahubog siya adtong tungora ug nakatulog ug wala na niya mamatngoni ang hitabo.
Dunay mga silingan nakadungog og siyagit sa biktima apan wala kini panumbalinga gumikan sa kadaghang mga bata didto sa palibot.
Sigun sa gihimong pakisusi ni Municipal Health Officer, Dr. Daisy Dabalos nga dunay dakong samad sa likod nga bahin sa ulo ang biktima ug dunay daghang bun-og ang nawong nga malagmit nga gisumbag kini sa suspetsado ug pagkahuman gidakdak ang ulo sa salog nga semento human kini lugosa.
Nahibaw-an usab nga nagkadugo ang kinatawo sa biktima ug dunay hugaw sa lalaki nga nagpamatuod nga gilugos kini.
Ang sperm cell nga nakuha gitakdang isumiter ngadto sa labarotoryo sa Gov. Celestino Gallares Memorial Regional Hospital sa dakbayan sa Tagbilaran aron matino kun kinsa ang nibuhat sa mangilngig nga krimen nga natala sa maong lungsod. (Andy Nalzaro)
