by boholbalita | Sep 21, 2010 | Headlines, Local News / Bohol Balita
KRITIKAL ang kahimtang sa usa ka 21-anyos nga lalaki human gidunggab sa iyang kauban sa tagay didto sa Purok 3, barangay Mangga, dakbayan sa Tagbilaran kagahapon sa alas 2 sa kaadlawon.
Biktima nailhan nga si Roegen Garces, ulitawo ug nagpuyo sa maong lugar.
Naigo ang biktima sa walang bahin sa iyang dughan ug gidala didto sa Gov. Celestino Gallares Memorial Regional Hospital sa siyudad ug giingong anaa sa talandugon nga kahimtang.
Suspetsado giila nga usa ka Beedk Esto, nagpuyo gihapon sa samang lugar.
Sa taho sa kapulisan nga samtang ang biktima kuyog sa iyang mga higala gikan sa usa ka disko sa naasoy nga lugar ug nagtagay didto sa balay sa usa ka Raden dihang nakabagat og panaglalis sa suspetsado.
Matud sa taho nga atol sa ilang panaglalis, gihansakan ang maongf biktima og usa ka mahait nga hinagiban sa maong suspek.
Nisibat ang natumbok nga responsable ug padayon pang gipangita sa mga ginskpan sa Tagbilaran City Police Station. (Andy Nalzaro)
by boholbalita | Sep 21, 2010 | Headlines, Local News / Bohol Balita
GRABENG hingsamdan ang usa ka ulitawo human gidunggab sa usa ka diskohan didto sa lungsod sa Mabini sayo sa kabuntagon kagahapon.
Ang biktima nga si Alex Igmilan, 21-anyos, nagpuyo sa Sitio Nangka naigo sa walang bahin sa iyang tiyan ubos sa iyang dughan ug anaa karon sa malisud nga kahimtang human gidala didto sa Gov. Celestino Gallares Memorial Regional Hospital sa dakbayan sa Tagbilaran.
Suspetsado giila nga usa ka Mario Ladaran, 34, minyo, taga-barangay Minol sa samang lungsod.
Nahitabo ang insidente mga alas 12:15 lapas sa tungang gabii kagahapon samtang ang biktima naglingaw-lingaw sa usa ka disko dihang kalit nga gihansakan sa suspetsado og usa ka mahait nga hinagiban sa way igong hinungdan.
Gisikop ang natumbok nga suspek sa mga sakop sa Mabini Police Station human sa insidente. (Andy Nalzaro)
by boholbalita | Sep 21, 2010 | Headlines, Local News / Bohol Balita
PATAY nang napalgan ang usa ka habal-habal drayber human kini naghikog pinaagi sa paghikot og pisi sa iyang liog didto sa ilang pinuy-anan sa barangay salvador, Sierra-Bullones, Bohol niadtong Biyernes sa buntag.
Biktima nailhan nga si Ramil Unajan, 37-anyos, ulitawo, nagpuyo sa maong lugar.
Sa taho sa kapulisan nga ang biktima nakit-an nga patay na sa iyang igsuon nga si Elmer Unajan mga alas 10 sa buntag sud sa iyang lawak diin ang biktima nigamit og usa ka pisi nga gihikot sa iyang liog diin ang tumoy niini gigaid sa babag nga kahoy.
Sigun sa pakisusi sa municipal health officer sa maong lungsod nga ang pagkatuok maoy hinungdan sa kamatayon sa maong biktima ug walay nagpaluyo nga tinunto sa hitabo. (Andy Nalzaro)
by boholbalita | Sep 20, 2010 | Headlines, Health and Medicine, Local News / Bohol Balita
IPAHIGAYON karong hapon ang province-wide nga massive clean-up drive batok sa dengue virus nunot sa pagsaka sa makamatay nga sakit.
Ang kalihukan nga gipasiugdahan sa kagamhanang probinsiyal ubos ni Gobernador Edgar M. Chatto pagasugdan ala 1:30 sa hapon hangtud sa alas 6 sa gabii.
Mga opisyal ug empleyado sa kapitolyo lakip na sa 47 ka mga lungsod ug sa siyudad sa Tagbilaran gitakdang mosalmot sa maong kalihukan alang sa kampanya batok sa dengue diin duna nay 1,412 ka mga Bol-anon ang nataptan ug siyam na ang namatay sukad sa bulan sa Enero hangtud sa Septiyembre 13 ning tiiga.
Lakip nga mosalmot sa kalihukan mao ang private sector, religious group ug non-governmental organizations.
Tuyo sa maong kalihukan nga malimpiyo ang palibot sa usa ka dapit ug ipangyabo ang mga tubig nga napundo aron wala nay maitlogan sa maong lamok nga nagdala sa virus.
Si Provincial Health Officer, Dr. Reymoses Cabagnot nibutyag kini sinugdana lamang sa ilang kampanya aron masumpo ang maong makamatay nga sakit ug mahimo kining masundan pa.
Ang dakbayan sa Tagbilaran nga maoy topnotcher nga dunay daghang kaso, gitakdang mohimo og clean-up drive sa barangay Cogon ug barangay Bool ug lakip sa ubang mga barangay nga dunay natalang daghang kaso. (Andy Nalzaro)
by boholbalita | Sep 20, 2010 | Headlines, Local News / Bohol Balita
Ang biktima giingong suod ni Mayor Jao
USA ka magtiayon gi-ambush patay sa duha ka wala mailhing armadong lalaki nga pulos nagtabon og sinina sa mga nawong didto sa nasudnong dalan sa barangay Pooc Occidental, Tubigon, Bohol kagahapon sa buntag.
Mga biktima nailhan nga si Alphonseus Boligao, 34, minyo, empleyado sa munisipyo sa Tubigon ug ang iyang asawa nga si Maricor, pulos nagpuyo sa maong lugar.
Si Alphonseus naigo sa iyang likod ug nabugtuan sa iyang kinabuhi dihang gihatud sa Tubigon Community Hospital.
Samtang si Maricor kinsa dunay duha ka samad pinusilan sa iyang likod gidala sa Ramiro Community Hospital sa dakbayan sa Tagbilaran, gideklarang patay na dihang nadangat sa maong tambalanan.
Sa taho sa kapulisan nga samtang ang mga biktima nagsakay sa ilang Toyota Corona kolor pula nga kotse nga may plaka 898-GAR mga alas 10:30 sa buntag gikan sa Du Ek Sam ug padung na mopauli dihang gisabayan og usa ka itom nga Honda XRM nga walay plaka.
Matud ni SPO4 Anecito Alipoyo sa Tubigon Police Station nga giingon nakabantay ang magtiayon sa duka ka suspetsado ug gigugkod apan gipusil kini sa makadaghang higayon.
Nisibat ang mga suspetsado kinsa pulos nakasul-ob og itom nga jacket paingon sa direksiyon didto sa lungsod sa Clarin.
Niingon si Alipoyo nga nakakuha sila og 11 ka basiyong bala ug tulo ka slug sa klaibre .45 nga pistola.
Nibutyag si Alipoyo nga ang biktima kinsa usa ka suod nga higala ni Mayor William Jao adunay mga kontra ug gituohang daang dumot ang hinungdan sa maong krimen.
Dugang niya nga dunay gikasuhan ang maong biktima human kini gipusil diin ang usa sa mga suspetsado usa ka barangay kapitan sa barangay Potohan nga si Roy Yosoya niadtong nakalabay nga tuig apan wala nila matumbok kun kinsa ang responsable sa maong hitabo. (Andy Nalzaro)
