by boholbalita | Sep 20, 2010 | Headlines, Local News / Bohol Balita
DUHA ka tindera og utanon gitulis sa tulo ka wala mailhing lalaki nga nakamotorsiko didto sa Del Rosario Street, Poblacion I, dakbayan sa Tagbilaran niadtong nakalabay nga gabii.
Apan malas ang mga tulisan kay pakyas sila sa pagkuha sa mga salapi sa mga biktima kay usa ka cellphone lamang ang nakuha niini.
Mga biktima nailhan nga sila si Marcelina Lamban, 46, minyo, taga-C.P.G East sa siyudad ug Daniela Ibañez, hamtong ang panuigon, minyo ug nagpuyo sa Poblacion I.
Nasayran sa taho nga samtang ang mga biktima kinsa pulos dunay puwesto sa City Central Market sa barangay Dampas sa dakbayan nanakay og usa ka tricycle nga dunay body number 2288 mga alas 8:45 sa gabii niadtong Miyerkulis dihang pag-abot niini sa maong dapit, kalit lamang nga nibabag kanila ang usa ka pula nga motorsiklo nga walay plaka luwan ang tulo ka lalaki.
Matud sa taho nga gipangtionan ang mga biktima lakip na ang bala ni Daniela ug gikha ang ilang mga bag lakip na ang usa ka Nokia nga cellphone ug nisibat.
Apan nasayran nga walay mga sulod nga salapi ang nakuha nga bag sa mga suspetsado.
Padayon pang gisusi sa kapulisan ang maong insidente. (Andy Nalzaro)
by boholbalita | Sep 20, 2010 | Headlines, Local News / Bohol Balita
GIKLARO sa Philippine Army nga dili tinuod ang ningtumaw nga taho nga dunay presensiya sa 50 ka mga armadong tawo didto sa bukirang bahin sa utlanan sa mga lungsod sa Dimiao ug Valencia.
Si Lt. Col. Romeo Brawner, commanding officer sa 2nd Special Forces sa Philippine Army nga nakabase didto sa barangay Riverside, Bilar, Bohol nibutyag sa usa ka pakighinabi sa usa ka sibyaanan sa radyo.
Matud ni Brawner nga walay basehan ang ninggawas nga report kinsa nikatap human dunay tulo ka mga lalaki, usa niini nakuhaan og armas nadakpan didto sa lungsod sa Dimiao niadtong nakalabay nga semana.
Apan bisan pa niini, niingon si Brawner nga padayon gihapon ang ilang pagmonitor kalabot sa maong taho.
Sayo niini, ang probinsiya sa Bohol gideklarang insurgency-free atol sa Regional Peace and Order Council meeting sayo ning tuiga sa administrasyon ni kanhi Gob. Erico Aumentado. (Andy Nalzaro)
by boholbalita | Sep 16, 2010 | Headlines, Local News / Bohol Balita
NAILHAN na sa kapulisan ang tulo ka mga suspetsado nga nitabang og lugos sa usa ka maanyag nga 17-anyos nga dalaga didto sa usa ka sak-anan sa barangay Tejero, Jagna, Bohol.
Si PO Jill Rasonabe sa Women and Children’s Desk sa Jagna Police Station nitug-an sa Bohol Balita kagahapon nga duna nay set sa mga suspetsado nga ilang gisundan.
Apan niingon si Rasonabe nga dili una nila ibutyag ang mga pangalan sa gitumbok nga mga suspetsado aron dili maguba ang ilang gihimo nga imbestigasyon.
Nibutyag si Rasonabe nga malagmit nga taga-barangay Tejero ra ang mga responsable sa maong paglugos gumikan kay nasuhito kini sa maong lugar.
Matud niya nga gipaubos na sa medical nga eksamin ang maong biktima ug naghulat lamang sila sa resulta niini ug makumpleto ang ilang imbestigasyon aron ipasang-at ang tukmang sumbong batok sa mga responsable.
Sayo niini, ang biktima nga ilhon lamang nga si Venus gilugos sa tulo ka wala mailhing lalaki samtang siya didto sa sud sa sak-anan sa iyang hininugma niadtong Sabado sa alas sa 8 sa buntag.
Sa pamahayag sa biktima nga samtang siya gibilin sa maong sak-anan sa iyang hinigugma kay moadto sa gitrabahoan niini,. kalit lamang nisud ang mga suspetsado agi sa pultahan sa kusina.
Usa sa mga suspek ang nition kaniya og kutsilyo samtang ang usa nigunit sa iyang mga kamot diin ang unang suspek maoy niuna og lugos kaniya ug pagkahuman nipuli ang ikaduha nga lalaki samtang ang ikatulo igo lamang nga nagsud-ong sa gibuhat sa iyang mga kauban.
Ang insidente nahibaw-an sa uyab sa maong biktima human kini nibalik sa iyang sak-anan mga alas 9:30 sa buntag kay dunay nakalimtan nga papeles. (Andy Nalzaro)
by boholbalita | Sep 16, 2010 | Headlines, Local News / Bohol Balita
Province-wide massive clean-up drive himuon sa kagamhanang probinsiyal ug kalungsuran karong Biyernes sa hapon.
MIKABAT na ngadto sa 1,412 ka mga Bol-anon ang nataptan sa makamatay nga sakit nga dengue ug siyam na ang namatay niini gikan sa bulan sa Enero hangtud sa Septiyembre 13 ning tuiga.
Kini maoy gibutyag ni Provincial Health Officer, Dr. Reymoses Cabagnot ngadto sa Bohol Balita kagahapon.
Matud ni Cabagnot nga siyam sa mga namatay, tulo niini natala sa dakbayan sa Tagbilaran, usa sa lungsod sa Calape, usa sa Baclayon, usa sa Garcia-Hernandez, usa sa Ubay, usa sa Loay ug usa sa lungsod sa San Miguel.
Niingon usab si Cabagnot nga ang Tagbilaran maoy nanguna sa pinakadaghang nataptan sa maong sakit sa napulo ka lugar sa Bohol diin nitala na kini og 400 ka mga kaso, gisundan sa Talibon nga may 59 ka kaso, Dauis ug Carmen nga managsama nga dunay 57 ka kaso, Maribojoc, 55; Calape, 51; Baclayon, 45; Alburquerque, 43; Loon, 42; Cortes, 41; Garcia-Hernandez, 35; Panglao ug Dimiao nga managsama nga dunay 30 ka kaso.
Pasabot ni Cabagnot nga sa mga kalungsuran, mag-utro-utro ang ranking sa mga nataptan gumikan kay dunay mga lungsod nga nianam og saka ang kaso sa mga nataptan.
Nunot niini, ang kagamhanang probinsiyal ubos ni Gobernador Edgar Chatto niisyo og usa ka direktiba ngadto sa tanang local government units (LGU”s) , mga empleyado sa gobyerno, pribado ug mga reliheyosong grupo nga mosalmot sa province-wide nga massive clean-up drive.
Ang maong kalihukan nga gitawag usab og Operation Uga gitakdang pagasugdan mga 1:30 sa hapon karong Biyernes diin ang mga opisyales ug mga empleyado sa kapitolyo ug sa 47 ka kalungsuran ug sa siyudad magdungan og hinlo sa palibot sa tagsa-tagsa ka mga dapit.
Dugang ni Cabagnot nga dunay kemikal nga gitawag og larvicidal nga pangpatay kini sa mga larva ug itlog sa lamok ang ipanghatag sa mga kalungsuran.
by boholbalita | Sep 16, 2010 | Headlines, Local News / Bohol Balita
DUHA ka grupo sa mga mangingisda nga managsamang nigamit og ilegal nga pamaagi sa pagpanagat ang gidakop sa Task Force Kalikasan ug fish warden didto sa lungsod sa Pres. Carlos Garcia niadtong Lunes sa gabii ug kagahapon sa sayong kabuntagon.
Unang nadakpan nailhan nga sila si Boyet Gavas, 31, minyo; Santos Dabatos, 29, minyo; Nesio Fernan, 20, ulitawo ug Roy Mendoza, 19, ulitawo kinsa pulos taga-barangay Gaus sa maong lungsod.
Samtang ang ikaduhang grupo nailhan nga sila si Jason bayot, 27, minyo; Jerome Angoo, 29, minyo; Rey Tutor, 40, minyo ug Booby Curimo, 37, minyo pulos nagpuyo sa barangay Cuya, Ubay, Bohol.
Sa taho sa kapulisan nga samtang ang maong task force nihimo og seaborne patrol sa kadagatan ilang nasigpatan ang unang grupo pasado alas 11 sa gabii nga nigamit og usa ka compressor sa pagpangisda duol sa fish sanctuary didto sa barangay Aguihing sa maong lungsod.
Nabawi gikan sa unang grupo ang usa ka pumpboat kolor puti nga may 16 HP Briggs and Stratton nga makina, usa ka compressor nga may paraphernalia, lima ka pana ug upat ka goggle.
Samtang ang ikaduhang grupo nasigpatan mga 1:30 sa kabuntagon nga nigamit usab sa samang paagi.
Nakuha gikan kanila mao ang usa ka pumpboat nga may 16 HP Briggs and Stratton nga makina, usa ka compressor nga may tapot nga paraphernalia, duha ka pana, 2 ka goggle ug duha ka kilo sa managlahing klase sa isda.
Gidala ang mga suspetsado didto sa kapulisan sa maong dapit alang sa dugang nga imbestigasyon. (Andy Nalzaro)
