by boholbalita | Sep 11, 2010 | Headlines, Local News / Bohol Balita
SI Senior Supt. Constantino Barot Jr. pormal nang nilingkod isip bag-ong officer-in-charge sa Bohol Provincial Police Office hulip kang outgoing director Senior Supt. Rodolfo Llorca atol sa turned-over ceremony didto sa Kampo Dagohoy kagahapon.
Si Senior Supt. Silvestre Primero, Deputy Regional Director for Administration maoy ni-officiate sa kalihukan kinsa gitambungan nila ni Gobernador Edgar M. Chatto, provincial administrator Alfonso Damalerio II, mga hepe sa kapulisan ug ubang opisyales sa lalawigan.
Atol sa iyang mensahe, iyang gisaad nga makigtambayayong ang kapulisan alang sa kalambuan sa probinsiya sa Bohol pinaagi paghatag og saktong seguridad sa katawhang Bol-anon.
Gipunting ni Barot ang bag-ong nahitabo nga hostage crisis didto sa Manila niadtong Agosto 23 diin nikalas og walo ka turista gikan sa Hongkong lakip na ang hostage taker nga niresulta sa pag-us-os sa tourist arrivals ug naapektuhan niini ang Bohol.
Matud niya nga iyang gihagit ang kapulisan nga mohatag unta kini og positibo nga pagtagad aron makabangon sa maong insidente.
Nagpasalamat si Barot sa mga taas nga opisyal sa PNP lakip na kang Chatto nga gihatagan siya og kahigayonan nga mahimong provincial director.
Si Barot kinsa lumad sa Negros Oriental kanhi nadestino sa United Nation Police heaquarters sa East Timor niadtong Abril 12, 2009-Abril 10, 2010 diin nibalik siya sa nasud ug nadestino sa Kampo Crame.
Nakadawat siya og daghang mga awards sa iyang pagserbisyo isip pulis.
Siya naminyo ngadto kang Nina Socorro G. Barot kinsa nga lumad didto sa lungsod sa Balilihan. (Andy Nalzaro)
by boholbalita | Jul 10, 2010 | Local News / Bohol Balita
76-ANYOS nga biyuda nakuhaan og dakong kantidad sa salapi human nailad sa duha ka wala mailhing babaye nga gidudahang sakop sa usa ka budol-budol gang sud sa usa ka iladong fastfood chain ning dakbayan sa Tagbilaran niadtong Lunes sa buntag.
Biktima nailhan nga si Lorenza Pesodas, lumad ug nagpuyo sa barangay Cogon Norte, Loon, Bohol.
Basi sa pamahayag sa biktima didto sa Tagbilaran City Police Station nga ni-withdraw siya og P81,500 gikan sa BDO sa dalan C.P.G. Avenue ug pagkahuman nisulod sa City Square aron mobayad sa iyang bayranan sa koryente sa buhatan sa BOHECO nga anaa mahimutang sa maong establisamento.
Matud sa biktima nga samtang siya naglingkod sa maong buhatan, giduol siya og duha ka babaye kinsa nagpasumangil og pangutana kun asa dapit makakuha og sakyanan nga modala sa ilang kinompra nga sinako nga asukar.
Niingon ang biktima nga gidala siya sa duruha sa Jolibee Alturas Branch diiin didto gipakita kini og usa ka itom nga bag nga puno sa mga salapi ug mga alahas ug nikumbinsir sa nahauna nga ila kining ibilin ngadto kaniya kay mahadlok sila nga tulison hinungdan nga ilang gikuha ang iyang salapi nga iyang gi-withdraw sa bangko isip garantiya.
Gisultihan siya sa mga suspek nga mobalik dayon ug pahuwaton.
Apan dangtan og pipila ka mga minutos, napakyas og balik ang duruha hinungdan nga giablihan sa biktima ang maong bag ug nakugang na lamang siya kay pulos pinutol nga mga papel ang sulod niini. (Andy Nalzaro)
by boholbalita | Jul 10, 2010 | Local News / Bohol Balita
MAGTIAYON nga negosyante nakalingkawas sa pagsuway sa pagtulis kanila sa duha ka armadong lalaki didto sa barangay Magsaysay, Sevilla, Bohol niadtong Huwebes sa hapon.
Giila ang mga biktima nga sila si Conrado Marasigan, 43-anyos, minyo ug ang iyang asawa nga si Arlene Marasigan, 37-anyos, nagnegosyo og lumber ug taga-barangay Cogon, Balilihan, Bohol.
Nasayran sa taho nga samtang ang mga biktima nagsakay sa ilang multicab nga gimanehoan ni Conrado mga 1:30 sa hapon ug nagdagan sa barangay road sa maong dapit dihang kalit nga nibutho ang mga suspetsado usa niini armado og de kalibre nga pistola ug nimandar og pahunong.
Matud sa taho nga gimanduan sa mga suspek si Arlene nga itunol ang iyang shoulder bag nga may sulod nga salapi apan nibalibad ang naulahi hinungdan nga nagbinunlotay ug nakiglayog ang biktima sa maong tulisan nga nanawag og pakitabang sa ilang back-up nga nitago sa kasagbutan nga bahin apan wala kini niduol hinungdan nga nakahigayon og padagan si Conrado ug nipasirit sa ilang sakayanan pahilayo.
Gipusil ang mga biktima sa suspek apan wala kini makaigo.
Apan ang duha sa mga suspetsado nadakpan sa gihimong hot pursuit operation sa mga sakop sa Sevilla Police Station sa duha ka managlahing lugar sa dakbayan sa Tagbilaran kagahapon sa buntag.
Si Senior Inspector Basiledes Balistoy, hepe sa Sevilla PNP kinsa maoy nangulo sa operasyon niila sa mga suspetsado nga sila si Ariel Dugoy alias Aye, 19-anyos, ulitawo ug taga-Hanopol, Balilihan, Bohol ug Alberto Yugo, hamtong ang panuigon ug taga-barangay Cambagui, Sevilla, Bohol.
Matud ni Balistoy nga si Dugoy nadakpan mga alas 6 sa buntag didto sa balay sa iyang uyoan sa Sacred Heart Village sa barangay Cogon sa siyudad samtang si Yugo didto nadakpan sa bunkhouse sa Tagbilaran Community Hospital.
Ang duha gidala didto sa Sevilla samtamg tukmang sumbong giandam pa aron ipasaka sa piskaliya. (Andy Nalzaro)
by boholbalita | Jun 10, 2010 | Local News / Bohol Balita
GITUDLO ni Gobernador Erico Aumentado si Bise Gob. Julius Caesar Herrera isip acting Governor samtang gitudlo usab si Bokal Cesar Tomas Lopez isip acting Vice Governor gikan Hunyo 8-10.
Kini tungod kay ang gobernador ikauban ni Presidente Gloria Macapagal Arroyo sa iyang opisyal nga byahe isip pangulo sa delegasyon sa Pilipinas nagdto sa Shanghai World expo sa China.
Gimandu sa gobernador sa iyang memorandum ngadto ni Herrera ug Lopez, nga ang duha magabuhat sa mga buluhaton ug responsibilidad nga nasubay sa balaod sagun sa Local government Code.
Lakip na usab sa adtoon nila ni Presidente Arroyo uban sa gobernador mao ang kasaulugan sa Philippine National Day nga nailahan sa Filipino Chinese Friendship Day Hunyo 9. (PIA Bohol)
by boholbalita | Jun 10, 2010 | Election 2010, Local News / Bohol Balita, National News
GILARAW ni Senador Manuel “Mar” Roxas ang pagpasak ug electoral protest batok sa naproklamang Bise Presidente nga si Jejomar Binay.
Matud ni Roxas sa iyang pamahayag, buot siyang matuki ang labing dako mga gidaghanon sa boto sa pagka bise presidente nga gi-balewala sa pag-ihap aron sugdan ang tinud-anay ug kompleto nga iphanay agi ug utang niya sa katawhan.
Sumpay ni Roxas, kinsa apo sa kanhi Presidente nga si Manuel Roxas, iya na nga gimandu sa iyang mga abogado ang paghipos sa mga ebidensya aron katun-an ang protesta nga ipasaka sulod sa 30 ka adlaw human maproklama si Binay niadtong Hunyo 9.
Hinuon, midaug ug naproklama na usab ang Presidente sa nasud, kinsa kauban kang Roxas sa partido ug kadugo usab sa mga dagkong apilhedo sa politika nga Aquino-Cojuangco.
