by dalareich | Jun 17, 2008 | National News
HUGOT ang baruganan sa Malakanayang kabahin sa dili paghatag ug ransom sa mga pagpanakmit, bisan pa sa tagal nga gihatag sa mga kidnappers alang sa kalingkawasan nila ni Ces Drilon ug iyang cameraman.
Gidemenda usab sa grupo nga sakop sa Abu Sayyaf ang P15M nga ransom bugti sa kalingkawasan sa natumbok nga mga biktima.
Sa iyang una nga media interview, si Press Secretary Jesus Dureza, kinsa kanhi negosyador sa kagamhanan alang sa pagpatunhay sa kalinaw sa nasud, mibutyag nga ang pagahatag sa ransom maka-aghat hinuon sa mga pundok sa kidnappers nga manakmit sa uban pang mabiktima, ug kini magbutang sa daghan pang kinabuhi sa peligro.
Hinuon usab, matud niya, dili mabasa ang hunahuna sa mga kidnappers, mao nga ang ultimatum nga gibugtaw, dili angay nga bale-wala on.
Ning higayona, padayon pang gi-bombahan sa mga pwersa sa kagamhanan ang kalasangan sa timog Jolo, diin ang mga rebeldeng Abu Sayaff naghudhod uban sa ilang bihag nga sila Drilon, cameraman Jimmy Encarnacion ug Mindanao State University professor ug peace advocate Octavio Dinampo.
Gikataho nga ang bahan ni Drilon, paingon na unta nga makigtigum sa usa ka lider sa Abu Sayyaf sa dihang sila gisakmit niadtong Hunyo 8.
Lain nilanmg kauban, si Valderama gibuhian na human may mibayag ug P100 mil. (rachiu/PIA)
by dalareich | Jun 17, 2008 | National News
Ang kanhi Presidential Adviser Jesus Dureza misugod na sa iyang bag-ong pangatundanan isip Kalihim sa Prensa, puli ni Ignacio R. Bunye.
Si Bunye, lima ka tuig nang mikupot sa maong pwesto isip Kalihim sa Prensa ug Tigpamaba sa Malakanyang. Siya karon mosugod usab sa iyang bag-ong pangatunadan sa Monetary Board (MB) sunod bulan.
Si Dureza naka-angkon sa ika-napulo ka lugar sa gihimong eksaminasyon sa pagka-abugsya, usa ka kanhi “editor-in-chief sa Mindanao Times ug “correspondent” sa Manila Times ug Manila Bulletin sa kapin sa 15 ka tuig.
Napili usab siyang “congressman” sa primerong distrito sa Davao ug nahimong tigpamaba ni kanhi Presidente Fidel Ramos.
Di pa lang dugay gi-ila siya ni Presidente Gloria Macapagal Arroyo isip “development champion” sa programa sa Presidente nga “super regions economic development plan” sa Mindanao, ug sa iyang aktibong pagdumala ka kalinaw sa maong dapit.
Sa nahi-unang pakighinabi, gibutyag ni Dureza nga walay kabag-uhan sa iyang buhatan ug iyang palapdon ang prensa, samtang buot usab niyang idu-ol ang Malakanyang sa mga “provincial press and masses”.
Plano usab niya nga himoong “partner” ang “media” ug pangayu-on ang suporta niini sa epektibong pagdula sa kagamhanan. (PIA/Bohol)
by dalareich | Jun 17, 2008 | National News
Gimanduan ni Presidente Gloria Macapagal-Arroyo ang upat ka ahensiya sa kagamhanan nga mao ang motu-tok sa pagbalhin sa mga makina sa sakyanan gikan sa gasolina sa paggamit og mga altentibong krudo. Kini aron lig-unon ang pagpatuman sa Bio-Fuels Act.
Sumala sa direktiba, ang upat ka ahensiya mao ang Departmento sa Enerhiya (DOE), Department of Transportation and Communication (DOTC), Department of Trade and Industry (DTI) ug ang Department of Science and Technology (DOST).
Gibutyag kini sa Presidente sa dihang gilusad ang terminal sa mga hybrid buses, LPG ug CNG driven vehicles or Clean Air Buses (CAB), apil ang mga taksi ug jeepney didto sa SM Central Business Park Bay.
Ang paglusad pinasubay sa inisyatibo sa Presidente aron pagtabang sa mga pampublikong sakyanan pagsagubang sa nagsakang presyo sa krudo. Kini usab pinasubay sa programa sa Land Transportation Franchising and Regulatory Board kon LTFRB nga “Makabagong Sasakyan Para sa Ligtas na Kalusugan at Kapaligiran Tungo sa Mabilis, Maingat at Maginhawang Paglalakbay.”
Gimanduan usab sa Presidente si Kalihim sa Enerhiya Angelo Reyes pag-“convert” o pagbalhin sa tanang sakyanan sa kagamhanan gikan sa paggamit og krudo sa paggamit na ug LPG. Kini molangkub sa 21 porsyento sa tanang sakyanan sa nasud.
Ang Presidente mipasalig usab nga tabangan kon kinsa man gani ang bu-ot mo balhin o magpa-‘convert’ sa ilang pampulikong sakayanan o jeep sa paggamit og LPG. (PIA/Bohol)
by dalareich | Jun 16, 2008 | National News
Si Presidente Gloria Macapagal-Arroyo moapod-apod og mga sertipiko sa lima ka mga grupong dipasayru-an nga mogamit na og LPG gikan sa krudo.
Sumala sa programang “Mga Makabagong Sasakyan Para sa Ligtas na Kalusugan at Kapaligiran Tungo sa Mabilis, Maingat at Maginhawang Paglalakbay,” ang pagbalhin og pag-gamit sa mga sakyanan og LPG gikan sa krudo apil sa programang sa kagamhanan sa pagbag-o o pagmoderno sa mga pampublikong sakyanan.
Apil usab kini sa programa sa administrasyong Arroyo aron saka-an ang kita sa mga drayber nga na-apektuhan sa gasakang presyo sa lana.
Sa iyang kabahin, gipatin-aw usab ni Land Transportation Franchising ug Regulatory Board (LTFRB) Chairman Thompson Lantion, nga ang tumong ug tuyo sa maong programa mao usab ang pagpalig-on sa pagpatuman sa “Clean Air Act Law”.
Ang Presidente usab gitakdang mo-lusad sa terminal sa mga PUV’s nga mogamit og alternatibong gasolina, “hybrid bus” nga modagan gamit ang compressed natural gas (CNG), airport taxi nga adunay “meter-issuing receipt”, ug pambulikong sakyanan gamit ang liquified petroleum gas kon LPG didto sa SM Mall of Asia (MOA) Complex.
by dalareich | Jun 16, 2008 | National News
Gimanduan ni Presidente Gloria Macapagal-Arroyo ang Departamento sa Agrikultura (DA) nga palig-unon ang mga pamaagi sa pag-protehir sa panglawas sa katawhan ug ang P60-bilyones nga industriya sa “poultry” o manokan sa nasud batok sa “bird flu virus” (AI).
Ang DA, bag-o pa lang mi-pataw og mando sa temporaryong pagdili sa tanang inangkat nga produktong langgam, manok ug “poultry” gikan sa nasud sa Denmark. Kini base sa taho nga nakasinati og “bird flu virus” ang maong nasud.
Matud pa ni Kalihim Arthur Yap sa Agrikultura, ang pagdili milangkob sa tanang “domestic ug wild birds og ilang mga produkto; lakip ang “day-old chicks”, itlog ug semilya.”
Gawas sa Denmark, ang Pilipinas mipataw usab ug temporaryong pag-dumili sa pag-angkat sa mga langgam ug produktong “poultry” gikan sa mga nasud sa Korea, Saudi Arabia, Poland ug Benin sa nasud sa Africa. Kini aron masiguro nga protektado ang panglawas sa katawhan ug ang industriya sa manokan sa nasud.
And nasud sa Pilipinas nagpabilin nga luwas sa “bird flu” nga sakit, sukad pa kini nadiskobrehan sa rehiyon sa Asya niadtong tuig 2003. (PIA/Bohol)
