TAGBILARAN CITY, Bohol, Oct. 18 (PIA)–Peligro sa panglawas ug mahimong makamatay ang dala nga hilo sa mga sakyanang dili sakto ang pagka-convert sa Auto-Liquified Petroleum Gas (ALPG).
Kadaghanan niini sa mga pampasaherong sakyanan sama sa taxi ug bus, mao nga dili luwas sa peligro ang driver ug pasahero.
Matud pa ni DOH-National Capital Region Director Eduardo C. Janairo, natino sa gihimo nilang pagtuon nga pipila sa mga nigamit og mga sakyanang LPG-converted nga ang mga taxi driver nakasinati og pagsakit sa ulo, pagkalipong, paggaan sa paminaw sa ulo ug pag-uga sa tutonlan.
Sa rapid health assessment study sa Center for Health National Capital Region, nakumpirmar usab nga ang uban sa mga epekto sa pagka-expose sa auto-LPG nag-apil sa pagpanakit sa ulo, likod, tangkugo ug dughan, pagbaton og ubo, pagkalipong, pagka-uga sa tutonlan, pagka-luya ug pagluya sa mga muscle, pagsuka ug lisod sa pagginhawa.
Giingong makuha ang maong mga sintomas tungod sa nakuhaang delivery sa oxygen sa mga vital organs sa lawas. Natino pa nga ang overexposure sa auto-LPG mahimong hinungdan sa pagkawala sa panimuot o pagkamatay.
Tungod niini, girekomendar sa DOH-NCR sa mga taxi operators ug drivers nga magpa-convert lamang sa mga lehitimo o accredited conversion facilities sa Department of Trade and Industry (DTI).
Ang ALPG nga napa-ilaila sa nasud niadtong 2005, adunay mixture sa light hydrocarbon gases propane (30%) ug butane (70%).
Matud pa sa DOH, kinatibuk-ang 19,052 taxi ang converted sa auto-LPG sukad 2005 hangtud 2011, o average nga 2,000 taxi matag tuig. (PIA-Bohol/ecb/I-hd)
