TAGBILARAN CITY, Bohol, June 21 (PIA)–Posibleng ugma (Biyernes), pirmahan na ni Presidente Benigno “Noynoy” Aquino III ang Executive Order (EO) sa bag-ong mining policy sa nasud.
Matud pa sa Presidente nga misaad si Executive Sec. Jojo Ochoa nga sa katapusan sa semana matubag na nila ang iyang mga pangutana.
Matud pa sa Pangulo, kinahanglan’g mabalanse ang kitaon sa pagmina ug epekto usab niini sa kalikopan.
Giingong gilauman usab niini ang mas hugot nga regulasyon sa mga small scale miners nga kasagaran nga gibasol kun adunay landslide sa ilang lugar.
Partikular usab nga gipatun-an sa Presidente ang sharing sa kitaon tungod kay sa pagkakaron, naa sa 2 percent lamang ang nakolektang buhis sa gobyerno gikan sa mga mining companies.
Giingong angay masiguro nga dili alkansi ang gobyerno ug igo ang salape nga masingil niini bugti sa perhuwisyo tungod sa pagmina sa kalikopan. (PIA-Bohol/ecb)
PH aircraft, mopahigayon og aerial survey sa Scarborough Shoal
TAGBILARAN CITY, Bohol, June 21 (PIA)–Gi-anunsyo ni Presidente Benigno “Noynoy” Aquino III nga mopahigayon og aerial survey ang aircraft sa Pilipinas sa Scarborough Shoal.
Kini aron mahibaw-an kun kinahanglan pa bang magpadala og mga barko sa gi-ilogan nga teritoryo sa West Philippine Sea.
Matud pa sa Presidente, kun mogawas sa aerial survey nga wala nay barkong naka-deploy didto ang ubang nasud, dili na usab magpadala og barko ang Pilipinas.
Pasabot pa sa Presidente, imposibleng magbutang og mga permanenteng barko nga magbantay sa Scarborough Shoal tungod kay limitado usab ang pasilidad sa Philippine Coast Guard.
Ipahigayon unta ang misyon sa milabay nga Martes, Hunyo 19 apan wala gipadayon tungod sa dili maayong panahon. (PIA-Bohol/ecb)
