TAGBILARAN CITY, Sept. 6 (PIA)—GIKUMPIRMA ni Presidente Benigno “Noynoy” Aquino III nga ipadayon sa iyang administrasyon ang government broadband network (GBN) project.
Apan daling gi-klaro sa Presidente nga lahi kini sa gibasurang National Broadband Network (NBN) deal sa Chinese firm nga ZTE Corp.
Matud pa sa Presidente, naghimo na og inventory ang Department of Science and Technology (DOST) kun unsa ang mga pasilidad sa gobyerno aron mahimong basehan sa broadband
network.
“There is a need for a broadband project but we are thinking of utilizing what we already have. The DoST is doing an inventory at present of what we have,” matud pa sa Presidente.
Gipahayag ni DOST Secretary Mario Montejo nga mokabat ngadto sa P800 milyon ang ilang pagtaya sa government broadband network.
Una nang miingon si Presidential Communications Office Secretary Ricky Carandang nga apil sa gitun-an sa DOST kun kinahanglan ba gayud sa gobyerno ang maong proyekto.
Kahinumdoman nga ang NBN-ZTE scandal ang usa sa mga isyung mibuto sa milabay nga Arroyo administration.
Samtang suportado usab sa gi-ila’ng whistleblower sa NBN-ZTE scandal ang pagbuhi og balik sa DoST sa multi-million peso broadband project.
Sa pakighinabi sa radyo kang Joey De Venecia III, miingon kini nga wala siya’y nakitang problema sa tinguha sa administrasyong Aquino nga ipadayon ang maong proyekto, diin gilauman nga maka-daginot ang gobyerno sa galastohan niini sa komunikasyon.
Apan pahinumdom ni De Venecia, angay nga siguradohon sa Presidente nga himuong transparent ang negosasyon sa kontrata.
Kahinumdoman nga niadtong tuig 2007, nabutyag nga niabot sa $329-milyon ang national broadband network (NBN) project tungod sa gidugang nga “patong” sa pipila ka government officials.
Apil sa mga nalambigit nga opisyal sila kanhi Commission on Elections (Comelec) chairman Benjamin Abalos, kanhi First Gentleman Mike Arroyo ug mismong ang kanhi Presidente Gloria Macapagal-Arroyo.
Sa maong mga opisyal, si Abalos lamang ang napasakaan og kaso sa Sandiganbayan. (PIA- Bohol/ecb)
