MANILA, June 2 (PIA)–Gilagdaan na isip hingpit nga balaod ni Presidente Benigo “Noynoy” Aquino III ang Republic Act 10863 o Customs Modernization and Tariff Act.
Matud pa ni Presidential Communications Operations Office (PCOO) Kalihim Herminio Coloma Jr., gilagdaan niadtong Lunes sa Presidente ang maong balaod nga maghatag og mas hait nga ngipon sa Bureau of Customs (BOC) ug maghatag usab og ginhawa sa mga Overseas Filipino Workers (OFWs).
Ubos sa bag-ong balaod, pasakaan ang tax exemption ceiling sa mga balikbayan boxes gikan P10,000 hangtud P150,000.
Nagpasabot kin nga kun dili motaas sa P150,000 ang kantidad sa ipadalang balikbayan boxes, dili na kini buhisan sa gobyerno.
Samtang gisaka sa P350,000 ang tax ceiling sa mga OFW nga namuyo sa ubang nasod nga dili mo-ubos sa 10 ka tuig nga mag-ule sa ilang mga napundar nga gamit gikan sa gigikanan nga nasod.
Mokabat usab sa P250,000 ang tax free sa mga kapin 5 ka tuig ug P150,000 alang sa dili molapas sa 5 ka tuig nga pagpuyo sa ubang nasod.
Ubos usab sa maong balaod mas mahimong sihag kun transparent na ang Bureau of Customs ug mas bug-at ang ipahamtang nga silot batok sa mga smugglers. (ecb/PIA7-Bohol)
