TAGBILARAN CITY, Bohol, Sept. 9 (PIA)–Gilagdaan na ni Presidente Benigno ‘Noynoy’ Aquino III ang Republic Act 10618 o “An Act Establishing Rural Farm Schools as Alternative Delivery Mode of Secondary Education and Appropriating Funds Thereof” o ang gitawag nga Rural Farm Schools Act.
Ipatuman sa Department of Education (DepEd) ang bag-ong balaod nga nagtinguhang mahatagan og alternatibong secondary education ang mga lalawigan. Walay bayad sa mga pampublikong rural farm schools, apan sa mga pribadong rural farm schools ubos niining bag-ong balaod, gamay lamang ang pagasinglon sa mga tinun-an.
Ang mga paryente sa mga CARP beneficiaries, dili magbayad kun motungha sila sa mga pribadong rural farm schools.
Usa ka tuig human kini ipatuman, gipaabot nga makaaghat ang DepEd sa pagtukod og bisan usa ka pampublikong rural farm school sa matag lalawigan diin sila ang ahensiya nga magpatuman niining balaod.
Sundon sa curriculum sa rural farm schools ang sumbanang gitakda sa DepEd alang sa mga taas nga tunghaan apan itutok niini ang pagtudlo sa agri-fishery arts.
Makatambayayong sa DepEd sa pagpatuman niining balaod ang Department of Agrarian Reform (DAR), Department of Agriculture (DA), Technical Education and Skills Development Authority (TESDA) ug Agricultural Training Institute (ATI).
Ang Rural Farm Schools gahinan og pondo sa General Appropriations Act. (PIA-Bohol/ecb)
