MANILA, Jan. 27, 2014 (PIA)–Adunay ipahigayon nga sere¬monya sa paglagda sa kinatibuk-ang Bangsamoro Peace Agreement human nga magkauyon ang gobyerno ug Moro Islamic Liberation Front (MILF) sa normalization annex sa kasabotan sa Kuala Lumpur, Malaysia ning bag-o lang.
Matud pa ni Presidential Communications Operations Office (PCOO) Sec. Herminio Coloma Jr., mahinungdanong kalampusan kini sa administrasyong Aquino aron magbaton og peace agreement sa MILF alang sa kalinaw sa Mindanao.
Giinong natapos na ang upat ka mahinungdanong annexes sa kasabotan sama sa transitional provision, power sharing, wealth sharing ug ang normalization annex.
Human sa paglagda sa gobyerno ug MILF niadtong Oktubre 2012 alang sa framework agreement, padayon nang nagkauyon ang duha ka panig ning bag-uhay lamang.
Matud pa ni GRP panel chairperson Miriam Coronel-Ferrer, target nilang iduso ang Bangsamoro Basic Law sa Kongreso sa Mayo aron makapatukod na og Bangsamoro entity.
Miyerkoles sa dihang gibuksan pagbalik ang negosasyon sa kalinaw. Nahimong taas ang paglaum sa duha ka panig nga magbaton kini og maayong resulta.
Biyernes sa dihang niabot sa Kuala Lumpur si Presidential Spokesperson Edwin Lacierda, Presidential Adviser on the Peace Process Ging Deles, Senator Koko Pimentel ug Zamboanga City Rep. Lilia Nuño.
Sabado sa dihang gilagdaan ang Annex on Normalization. Ang maong paglagda ang senyales sa katapusan sa 17 ka tuig nga negosasyon tali sa gobyerno ug sa grupong MILF.
Parehong emosyonal ang duha ka panig tungod kay human sa taas nga tuig, paglingkod sa upat ka Presidente ug siyam ka panel heads, natapos na gayud ang negosasyon tali sa gobyerno ug MILF.
Matud pa ni Ferrer, naumol kining kasabotan tungod na usab sa pagsalig sa MILF sa gobyerno ni Presidente Benigno Aquino paingon sa kabag-ohan. (PIA7-Bohol/ECB)
