Kanhi masa sa rebeldeng New People’s Army kun NPA ang usa ka sakop sa barangay tanod nga gipatay sa upat ka wala mailhing armadong lalaki didto sa Barangay Puting Bato, Buenavista, Bohol niadtong nakalabay nga adlaw.
Kini maoy gitug-an ni PO3 Emiliano Luga, imbestigador sa Buenavista Police Station dihang gihinabi sa Bohol Balita kagahapon.
Matud ni Luga nga dunay magsak-anan nga sakop sa NPA sa pinuy-anan sa biktima nga si Atenesio Manzo dihang aktibo pang naglihok and maong grupo.
Apan niingon si Luga nga wala pa nila mahibaw-i kun unsa gayud ang nagpaluyo sa pagpatay sa maong biktima gumikan kay padayon pa ang ilang gihimo nga imbestigasyon.
Sayo niini, si Manzo, 48-anyos,minyo, sakop sa barangay tanod sa maong dapit gipusil sa upat ka mga wala mailhing suspetsado samtang ang biktima padung na untang mopauli sa ilang balay mga alas 7 sa buntag niadtong Dominggo gikan naligo sa usa ka suba kuyog sa iyang pamilya.
Naigo ang biktima sa luyong bahin sa iyang ulo diin ang bala nilapos sa iyang agtang, wala ug tuo sa iyang abaga ug sa likod sa iyang lawas nga maoy hinungdan sa iyang kamatayon.
