TAGBILARAN CITY, Bohol, April 03 (PIA)–Gilusad sa Department of Environment and Natural Resources (DENR) ang programang “Basura-Free Election 2013” nga nagtinguha sa pag-aghat sa publiko nga dili maglabay bisan asa og mga campaign paraphernalia ug motabang sa paghinlo human sa eleksiyon.
Ang DENR nakighiusa sa Commission on Elections (Comelec) ug sa Department of the Interior and Local Government (DILG) aron mas mahimong epektibo ang maong kampanya nga may temang “Kalat Ko, Sisinupin Ko”.
Usa ka joint memorandum circular (JMC) ang gilagdaan kagahapon sa mga tinugyanan sa tulo ka ahensiya sa gobyerno aron masiguro nga ang mga lokal opisyal, political parties, party-list organizations, mga kandidato ug mga tig-suporta nila motamud sa probisyon sa Republic Act (RA) No. 9003, o ang Ecological Solid Waste Management Act of 2000 sa panahon sa pangampanya.
Ang RA 9003 naghatag og systematic, comprehensive ug ecological solid waste management system aron pagsiguro sa pag-protihir sa maayong panglawas sa publiko ug sa kalikopan pinaagi sa pagsagop og environmentally sound methods sama sa waste avoidance ug volume reduction.
Nilagda sa maong JMC sila DENR Undersecretary ug Chief of Staff lawyer Analiza Rebuelta-Teh, DENR Secretary Ramon J. P. Paje; DILG Assistant Secretary Rolando M. Acosta; ug Comelec Commisioner Lucenito N. Tagle.
Matud pa ni Comelec Commissioner Lucenito Tagle, panahon na aron mosanong ang pulitiko aron mahimong hinlo ang eleksiyon.
Samtang gipahinomdoman og balik ang mga kandidato nga gi-dili ang pagbutang og mga campaign materials sa mga ponuan sa kahoy. (PIA-Bohol/ecb/i-gg)
