TAGBILARAN CITY, Bohol, April 04 (PIA)—Gipahinumdoman ni Bureau of Internal Revenue (BIR) Commissioner Kim Henares ang mga negosyante ug mga indibidwal kalabot sa pag-file og income tax returns (ITR) sa saktong oras.
Kini tungod kay nagkaduol naman ang gitakdang deadline sa filing nga sa Abril 15, 2013.
Gitataw ni Henares nga walay ihatag nga extension ang BIR sa gitakdang petsa sa filing sa ITR.
Ang dili maka-file sa tukmang oras magbayad og 25 percent nga surcharge ug 40 percent per annum nga interest.
Kinahanglang mo-file og ITR ang mga individual ug corporate tax payers. (PIA-Bohol/ecb/p-gg)
Retailers og mga produktong petrolyo, gipasidan-an sa BIR
TAGBILARAN CITY, Bohol, April 04 (PIA)–Gipasidan-an sa Bureau of Internal Revenue (BIR) ang retailers og mga pinayuhot o smuggled petroleum product.
Sa usa ka press conference sa Department of Justice (DOJ) karong adlawa, miingon si BIR Commissioner Kim Henares nga angay siguradohon sa mga retailer nga dili smuggled ang ilang mga gibaligyang produktong petrolyo.
Pasidaan pa ni Henares, kasagarang mga retailers og smuggled oil products ang mapiit sa bilangguan tungod kay maka-ikyas man ang mga smuggler.
Apan daling gi-klaro ni Henares nga wala kini nagpasabot nga makalingkawas na sa ilang paggukod ang mga smuggler og mga produktong petrolyo.
Gibanabanang bilyon ka pesos ang nawala sa tax collection sa gobyerno tungod sa smuggling og gasoline products.
Una nang nipahayag ang Department of Finance (DOF) nga hugtan pa sa gobyerno ang importasyon ilabi na sa puthaw ug mga produktong lana sa mga dungguanan o port areas sa nasud.
Gibutyag usab ni DOF Sec. Cesar Purisima nga magpatuman ang iyang buhatan og port accreditation system aron dili sayon makapasulod og mga produktong kasagarang gipayuhot. (PIA-Bohol/ecb/i-gg)
