TAGBILARAN CITY, July 27 (PIA)–Ang Bohol Island State University-Bilar Campus maoy migawas nga kampeyon sa 2015 Sandugo street dancing competition nga gipahigayon kagahapon sa C.P.G. Sports Complex ning syudad sa Tagbilaran.
Mao kini ang ika-upat nga higayon nga nadughit sa BISU ang maong prestihiyosong indigay sa pagsayaw nga gi-haum sa selebrasyon sa Sandugo Festival ning tuiga nga gisalmotan sa walo ka mga hugpong sa mananayaw. Sila ang midaug niadtong 2012, 2013 ug 2014.
Nadawat sa BISU-Bilar ang ganting salapi nga nagkantidad og P300,000 ug tropeyo.
Ang Tagbilaran City ang nahimong 1st runner-up nga nakadawat og ganting P250,000 ug tropeyo.
Samtang nahimong 2nd runner up ang Baclayon nga nakadawat og ganting salapi nga P200,000 ug tropeyo.
Sa minor awards, napili nga “Best in Street Dancing” ug “Most Authentic Group” ang Camayaan National High School sa Loboc; “Most Unique Group” ang Ubay; “Most Disciplined Group” ang Mabini; “Most Colorful Group” ang Anda; ug “Most Symbolic Group” ang lungsod sa Catigbian. (ecb/PIA7-Bohol)
