Blackout sa Bohol karong Sabado
TAGBILARAN CITY, Bohol, Nov. 12(PIA)–Gipahibalo sa National Grid Corporation of the Philippines (NGCP) ang gitakdang blackout sa lalawigan sa Bohol sa umaabot nga Sabado, Nobyembre 15, 2014.
Ang maong power interruption magsugod sa alas 6 sa buntag hangtud sa alas 5 sa hapon nga maka-apektar sa Bohol Light Company, Inc. (BLCI), Bohol Electric Cooperative Inc. 1 (BOHECO I) ug BOHECO II.
Kini tungod sa pagsirado sa 138kV Ormoc-Maasin Line ug 138kV Maasin-Ubay Submarine Cable Line alang sa pagbalhin sa mga wires (ACSR conductors ug OPGW) gikan sa Emergency Restoration System (ERS) paingon sa permanent tower nos. 71 – 77 subay sa Ormoc-Maasin 138 kV line sa Leyte.
Ang mga estraktura sa ERS gitaod aron alisdan ang mga tore nga gitumba sa bagyong Yolanda sa niaging tuig. (ecb/PIA7-Bohol)
