TAGBILARAN CITY, Bohol, May 22 (PIA)–Gilusad sa Department of Education (DepEd) niadtong Lunes, Mayo 20 ang 2013 National Schools Maintenance Week o Brigada Eskwela sa syudad sa Tagbilaran pinaagi sa motorcade.
Ang maong motorcade naggikan sa buhatan sa DepEd City Division nga ni-agi sa Mansasa, Dampas, paingon sa Island City Mall, niagi sa dalan J.A. Clarin, niliko sa City Central School ug natapos sa Dr. Cecilio Putong National High School (DCPNHS).
Sa paghidangat sa DCPNHS, gisugdan dayon ang Kick-off Program nga gisalmotan sa mga magtutudlo ug mga opisyal sa mga tunghaan sa syudad, mga tinugyanan sa DepEd-Bohol ug City Division ug sa pribadong sector.
Ang maong kalihokan gibuksan usab sa nagkalain-laing tunghaan sa tibuok nasud.
Gitakda sa Mayo 20 hangtud 25, ang Brigada Eskwela ning tuiga nga naa na sa ika-10 ka tuig, nagdala sa tema nga “Isang Dekada ng Bayanihan sa Paaralan.”
Kining maong kalihokan nagsugod niadtong 2003 diin mag-uban ang mga magtutudlo, prinsipal, mga ginikanan, mga kabataan ug apil na ang tibuok komunidad aron manglimpyo ug i-andam ang mga tunghaan sa pagbukas sa klase sa Hunyo.
Pipila sa mga aktibidad nga gihimo mao ang pag-ayo sa mga kagamitan, pagpamintal sa mga lawak-tunghaan ug pagpanglimpyo sulod sa eskwelahan.
May ubang mga ginikanan usab ug hugpong sa pribadong sektor nga nihatag og mga gamit sa eskwelahan sama sa mga libro ug uban pang mahimong magamit sa mga estudyante.
Atol sa programa sa paglusad sa Brigada Eskwela nga gipahigayon niadtong Lunes sa DCPNHS grounds, gihimo ang pagtunol sa computer ug printer sa mga tinun-an sa DCPNHS Batch 1993 sa mga tinugyanan sa maong tunghaan.
Nihatag usab ang DCPNHS Batch 1988 ug mga gamit sa pagpanglimpyo sama sa mga silhig ug dust pan nga magamit sa gipahigayong Brigada Eskwela.
Nahimo nang inisyatibo sa DepEd ang pag-aghat sa lokal nga kumonidad sa pagtubag sa ubang panginahan sa mga pampublikong tunghaan ug mosalmot sa nasudnong paningkamot sa pagpa-uswag sa Philippine basic education. (PIA-Bohol/ecb/i-gg)
