TAGBILARAN CITY, May 30 (PIA)– Opisyal nang gibuksan karong adlawa ang tinuig nga Brigada Eskwela sa Department of Education (DepEd) diin ang mga estudyante, magtutudlo mga ginikanan ug uban pang volunteers magtinabangay sa paghinlo sa mga tunghaan sa dili pa magsugod ang klase.
Ang Brigada Eskwela 2016 nagdala sa tema nga “Tayo Para sa Paaralang Ligtas, Maayos, at Handa Mula Kindergarten Hanggang Senior High School” ug molanat kini taman sa Hunyo 4, adlaw nga Sabado.
Tumong niini dili lamang aron i-andam ang mga tunghaan sa pagbalik sa mga estudyante, apan aron usab i-andam ang tibuok nga implementasyon sa K to 12 program.
Alas 6 ganinang buntag gisugdan sa DepEd Tagbilaran City Division ang pagpahigayon sa caravan gikan sa Plaza Rizal ning dakbayan paingon sa CPG Avenue, Tamblot Street, B. Inting Street, Calceta Street, Eastern Cogon, Cogon, Booy South, Booy Main, Taloto, Ubujan, Manga, Tiptip, San Isidro, Cabawan, Dao, Dampas, City East, Mansasa, Bool, nibalik sa CPG avenue ug natapos sa Don Cecilio Putong National High School diin didto gipahigayon ang hamubong programa.
Samtang ang DepEd Bohol Division nisugod sa ilang Brigada Eskwela caravan sa may alas 6 sa buntag paingon sa lungsod sa Bien Unido diin gipahigayon ang programa ug opisyal nga pagbukas sa Brigada sa Carlos P. Garcia Technical Vocation School sa maong lungsod.
Sa maong programa, gigantihan ang mga mananaog sa Brigada Eskwela 2015.
Una nang gibutyag sa bag-o lang gipahigayon nga Kapihan sa PIA ni Bohol Division Superintendent Wilfreda Bongalos nga ang Lila National High School (LNHS) ubos sa principal niini nga si Cerlito Romero ang mananaog sa lalawigan sa Bohol isip pinakamaayo nga Balik Eskwela 2015 implementer.
Gawas niini, ang LNHS usab ang rehiyonal nga mananaog ug national awardee isip Best Balik Eskwela 2015 implementer. (ecb/PIA7-Bohol)
